Segun schedule di e contratista Albo, e trabaonan riba misa di Fatima lo keda cla na final di November. Ta spera cu drentando December por drenta tambe e misa cu su aspecto renoba, segun Pader Daniel Szpila.
E proyecto ta inclui full airco pa misa, pa por participa den celebracion cu trankilidad y disfruta di celebracion sin ansha di e calor. Ainda falta poco falta di fondo. Mas of menos pa locual ta e etapa aki, falta mas of menos 150 mil florin, comparando cu henter e suma, ya no ta dje tanto eynan. Ta spera cu lo alcansa esaki tambe cu poder di Dios y cu generosidad di Pueblo.
Misa ta bira chikito
Den cierto temporadanan e misa ta yen of e misa ta bira chikito y e hendenan ta bay pafo. Con lo acomoda e hendenan aki si cu e airco, e porta mester keda cera, tabata un pregunta cu nos a haci Pader Szpila. El a comenta riba esaki cu esaki ta un otro reto. Tin pensa di pone un conexion pa screen pafo. Manera den e casonan di Misa di Aurora, unda cu por pone un tent pafo, pa hende por tin contacto visual cu e celebracion riba altar, via camara y screen cu lo keda instala e ora eynan parti pafo. Mientras cu hende lo sinta bao di tent manera custumber.
Den caso di misa di Aurora, semper ta fresco logicamente. Ta un temporada fresco y den marduga tambe. Esaki lo no crea problema di calor. Cualkier otro celebracion, logicamente tur cos tin su limite y cada edificio tambe tin su limite. Lo purba semper di acomoda pueblo. Ohala tin constantemente un pueblo grandi, purba di acomoda semper mas comodamente posibel cu un participacion mas optimal posibel tambe.
