Tur hende tabata pendiente si e premio grandi di Mini Mega di 1.125 miyon lo keda aden of lo conoce un ganado den e sorteo di diamars. Maikel Trapenberg tabata un di e cumpradonan pendiente, cu e speransa cu e por yama su mama na Colombia pa inform’e di esaki. Y bingoo …El a gana e premio!
Diaranson mainta trempan Maikel a yama su mama Katrin Theophile aya na Colombia. “Bolbe Aruba lihe, mi tin algo di conta mama.” Den e mesun rosea el a bira cont’e cu el a gana Lotto. Katrin ta conta na prome instante el a kere ta un joke e yiu ta haci y kier pa e bolbe Aruba pa babysit e nieto. “No haci joke cu bo mama, ta hende grandi mi ta,” el a contesta e yiu.
Finalmente el a bin realisa cu no ta un joke, ni un soño pero e bunita realidad. El a realisa esaki momento cu demas famia a cuminsa yam’e. “Mi t’asina contento pa mi yiu cu di baina mi por guli e sopi cu mi ta comiendo ‘ki,” el a conta nos.
Katrin ta considera e premio aki un bendicion pa su yiu, kende ta un persona dedica na deporte. Maikel ta tata di cinco yiu y su pareha ta Guivanna. E ta entrena e muchanan di Rockets.
Maikel a pasa oficina di Lotto diaranson mainta pa mustra e ticket ganado. E ticket cu ta contene su numbernan di suerte y cu cual el a bira e di 4 miyonario di Aruba cu Lotto pa Deporte pa aña 2023!
Maikel a scoge su mesun numbernan cu a sali e numbernan ganado di e sorteo miyonario di diamars anochi y cu cual el a gana e bunita suma di 1 miyon 125 mil florin cu Mini Mega y Mega Plus! Y a cumpra esaki na Gwenny’s Lottery.
E hoben miyonario aki a tuma e permiso di operador di tour for di su mama, kende ta un pensionado caba y di e forma aki a dedica su mes na promove Aruba bou di nos bishitantenan, mescos cu su mama a haci den pasado.
Diamars tabata un bon dia p’e, segun el a conta e mama. El a saca basta dollar di tips y cu un parti di dje a pasa na Gwenny’s Lottery pa cumpra algun ticket di Mini Mega.
E mama ta corda cu semper e yiu ta bis’e “Ma…un dia mi ta gana un lotto” y e dia a yega. Pabien.
Cu e realidad ey riba mesa, Katrin ta preparando pa bula bin Aruba pa biba e momento di alegria aki cu su yiu. Un bon mucha homber, el a sigura, pasobra e tin un pasion grandi pa baseball y ta dedica na train muchanan den e deporte aki. “Ta un yiu masha bon lanta, nunc’un pone droga na su boca. Mi ta masha orguyoso di dje”, e mama a conta. E ta considera e premio un bendicion di Dios pa tur e cosnan bon cu ta haci na otro den bida. “Gloria y tur honor na nos Señor Dios”, Katrin e termina bisando.
