Tito de Cuba, representante di e dunadonan di trabao di Aruba durante e conferencia di e Organisacion Internacional di labor (ILO) na Geneve, Suisa, a papia riba e avancenan den inteligencia artificial y su repercusion den un pais chikito manera Aruba, specialmente den e contexto di husticia social promovi pa ILO.
Tito de Cuba a resalta cu ILO ta profundamente envolvi den e analisis di tur cos relaciona cu trabao, dedicando tempo considerabel n’e estudio di inteligencia artificial y su impacto riba trabao.
Un reciente estudio realisa pa un experto di ILO, titula “Generative AI and Jobs,” a revela cu Inteligencia Artificial generativo lo por afecta significativamente e paisnan cu entrada halto y cierto tipo di trabao, specialmente esunnan administrativo. De Cuba a señala cu, den e caso di Aruba, e impacto por ta menos debi n’e predominancia di e trabaonan den e sector di servicio. Den e sentido aki, Aruba por ta un poco trankil, ya cu un gran parti di e trabaonan ta relaciona cu servicio, caminda cu Inteligencia Artificial no lo tin tanto impacto manera e trabaonan administrativo, De Cuba a remarca.
ILO ta ofrece asistencia a traves di su expertonan pa yuda realisa mas investigacion riba con inteligencia artificial por afecta Aruba specificamente.
De Cuba a expresa su optimismo riba esaki, indicando cu pronto lo cuminsa mi e trabao cu ILO ta cuminsando riba e tereno aki.
Satisfaccion cu e temanan trata durante e conferencia
Ora cu a puntr’e riba e satisfaccion cu e temanan trata durante e conferencia, De Cuba a responde cu e tabata hopi contento. E temanan atendi ta fundamentalmente p’e ambito laboral y cu cada biaha cu nan asisti, nan ta haya idea cu por aplica na Aruba, el a conclui.
E conferencia di ILO ta sigi ta un plataforma crucial p’e representantenan di e paisnan chikito manera Aruba por compronde y prepara miho p’e cambionan tecnologico y su posibel repercusionnan riba mercado laboral.
