2 Cronicanan capitulo 15 vers 1 ta bisa: Señor ta cu boso, ora boso ta cu ne, y si boso busc’E, E lo laga boso hay’E, ma si boso bandon’E, E lo bandona boso.
Woooow, palabra fuerte di advertencia, pa nos haci, tur locual ta posibel pa permanece cerca Dios, no solamente di palabra pero di curason, Mas grandi y intimo nos relacion ta cu Dios, ta nos mes ta beneficia di dje y esey ta personalmente pa tur hende.(Mateo 15:8+9).
E mundo ta distrai hopi hende y hopi no ta ripara con nan ta aleha di Dios. Wak bon si bo reconoce e sintomanan aki den bo mes bida:
1 Pedro 5:8 ta bisa: Sea sobrio , sea alerta,boso adversario e diabel, ta cana rond manera un leon cu ta gruña,buscando ken e por devora.
Bo no ta haci Oracion ( Mateo 26;41)
Bo no ta lesa bo Bijbel.( Josue 1:8).
Bo no kier ta hunto cu hende cu ta kere den Dios, bo no kier tin comunion cu otro creyente (Galationan 6:2)
Bo no tin interes pa bishita e cas di Dios, ora hende puntra bo si bo ta bay cas di Dios, bo ta contesta mi ta bay wak.
E pica cu tabata molestia bo, no ta molestia hopi mas. ( Hebreonan 12:1) Bo ta tolera chiste sushi, palabra malo y bo no ta worry cu proposicion indecente, tur cos bo ta smile y like.
E palabra di Dios no ta afecta bo bida mas. Bo interes a baha completamente y bo a fria.
Sabi cu bo ta bira un cunuco fertil pa e enemigo, pasobra ta hopi tempo diabel tabata desea, pa bo cay bek den su gara, pasobra cada yiu di Dios cu cohe e caminda bieu di pica y inmoralidad bek ta un trofeo pa e enemigo.
Ta masha doloroso ora hende bandona Dios y sigui nan propio boluntad, pasobra deseonan impuro ta yena bo curason, pasobra bo ta bay tras di bo deseo y lubida riba Dios.
Romanonan capitulo 1:24-27 ta splica e peliger y consecuencia ora hende no ta respeta, ta aleha for di Dios, ta nenga completamente Su autoridad riba nan bida, y ta kere cu Dios lo sinta cu man crusa y laga nan haci locual cu nan kier.
E asunto aki ta hopi serio ora hende kere cu por haci bofon di Dios, pasobra e consecuencia lo ta fuerte, pa bo bida , bo cas y bo famia.
Caminda hende ta rechasa Dios, y mara na idolatria, violencia y maldad ta aumenta constantemente, hende ta bira ciego pa e berdad, drenta un felicidad falso, caminda mentira ta domina, y tur clase di scuridad ta wordo acepta.
Mescos cu un auto cu ta falta service tin tur sorto di zonido, asina un hende cu aleha for di Dios ta bira, e ta keha di tur sorto di forma.
Y maldad ta cuminsa acerca y alcansa bo curason y e siguiente cambionan ta cuminsa manifesta den bo bida:
Bo ta bira un campeon den trece confusion y pleitamento.(Salmo 140:2)
Bo ta cambia palabra y desvia hende.( Salmo 58:3).
Bo ta gaña, nenga responsabilidad, nenga e berdad, traha historia, y sconde informacion.(Proverbionan 6 : 18+19).
Bo consenshi no ta remorde, ora bo trompica den maldad, en bes di sali for di dje, bo ta deleita den dje, y bisti mascarada manera hende noble.( Proverbionan 10:23).
Bolbe bek na Dios. ( 1 Juan 1:9).
Sinceramente, Pastor Marcel Balootje.
