Pa loke ta Stoney Coral Tissue Loss Dissease cu ta asotando nos coralnan den lama rond di nos pais, Aruba tin su retonan. Segun minister di naturalesa, Ursell Arends aki, cu a cuminsa 2014 na Florida y a dura 9 aña pa yega den nos awanan, awo nos a cuminsa mira e efectonan, e mandatario a bisa.
Na Florida a purba di bring’e den diferente manera, cu no a duna su resultado. Na Aruba a cuminsa sinti e efectonan y ta mirando e impacto cu e tin caba. Durante fin di siman a duna un charla di kico e malesa aki ta. Diadomingo y dialuna, tin tayer p’asina aki haya colaboracion di tur esunnan cu ta biba di esaki, esta e buceadonan, e companianan cu ta percura pa dive y snorkel cu turista. Pa tur colabora hunto pa por mitiga e impacto di e malesa aki riba nos coralnan.
E ta algo desastroso. E mandatario a indica cu e Biologo Marino cu a presenta durante di e charla, e mes a bay dive na Saba, despues cu e malesa aki a pasa eynan. Ta lamentabel con bida marino ta haya un golpi duro asina aki. E malesa por dura tres pa cinco aña den lama y pa por recupera di esaki, e por dura hopi mas aña. Ta papia di crea un arca di Noe, pa saca algun di e coralnan aki, tene nan riba tera, kisas den un otro atmosfera a nan por crece y unabes cu e malesa aki pasa, por planta esakinan bek.