Un rato pasa na Pindastraat a tuma luga un caso serio. Tabatin un bringamento, cual a bay for di man. A bati e homber, kende a ricibi golpi fuerte y a fayece n’e sitio. Ta trata di Esdras Daniel Tejada, naci dia 7 di januari 1989 na Republica Dominicana di 35 aña.
Pa 7:50 pm a notifica central di e pelea. A despacha patruya policial y aki a topa cu e homber c’un herida na su cabes. Diferente departamento policial a presenta na e sitio pa asina atende cu e caso aki di asesinato. E homber a ricibi basta golpi na su cabes. Consecuentemente a lag’e cu herida severo.
A pidi presencia di ambulance pa trata cu e persona aki. E paramediconan cu a presenta n’e sitio a traha cu e victima, pero no por a haci nada mas. E homber a fayece n’e sitio mes.
Polis a detene dos persona. Un di e detencion tin di haber cu e morto di Daniel di 35 aña, mientras cu e di dos detenido ta relaciona pa no sigui ordo policial ya cu e tabata stroba polis haci su trabou.
Liliana Rasmijn, vocero di KPA, a indica cu esun cu por a mira of sa algo, pa yama e tiplijn 1141 y ta keda anonimo. E prome informe ta indica cu a dal Tejada cu un obheto skerpi, pero e investigacion lo determina esey. Aworaki e caso ta bou di investigacion policial.
