Thaïs Franken, a sali diasabra ultimo rumbo pa e isla Shetland na Escocia, pa representa Aruba y presenta como orador durante e “Island Studies International Conference” cu ta wordo organisa anualmente door di e organisacion “Small Island Cultures Research Initiative”. E aña aki e organisacion “Centre for Island Creativity” ta e anfitrion.
E organisacion “Small Island Cultures Research Initiative” ta un red internacional di academico cu ta facilita comunicacion y colaboracion entre investigado y practicante Cultural cu ta traha cu e comunidadnan di islanan chikito. E meta principal ta pa investiga y asisti cu e mantencion y desaroyo di Cultura n’e islanan chikito rond di mundo.
Como orador, Thaïs lo presenta e resultadonan di diferente investigacion haci riba e Industrianan Cultural y Creativo na Aruba, habriendo caminda tambe pa e proyecto importante di “mapping” di e Industrianan aki cu Fundacion Go Cultura a anuncia. Esaki ta pa finalmente colecta data y informacion importante y relevante pa por cuminsa encamina e proceso di formalisa y desaroya e industrianan aki.
Durante e conferencia na Shetland, Thaïs lo intercambia idea y lo percura pa network y forma alianza cu e investigado- y practicantenan cultural cu ta biba y traha n’e islanan chikito rond di mundo.
Thaïs G. Franken, MSc. ta un profesor den e facultad di Arte y Sciencia na Universidad di Aruba desde 2020. E ta duna les den ambos programa di “Social Work & Development” (SWD) y tambe “Organization, Governance y Management” (OGM). Banda di ta profesor, e ta investigado di e Instituto di Bon Gobernacion y Liderazgo di Aruba. Tambe e ta un candidato doctoral riba e topico di “civil society networks”.
Na aña 2018 el a termina su bachelor’s degree na e facultad di Arte y Ciencia na Universidad di Aruba defendiendo su tesis cu a wordo premia como e tesis di aña: “Placing Culture and Creativity at the heart of the Aruban sustainable development”, investigando e posibel impacto economico, cultural y social di un Industria Creativo.
Desde e aña ey el a bira un portavoz importante pa e formalisacion y desaroyo di e Industrianan Cultural y Creativo di Aruba. Conscientisando continuamente di e potencial y e balor di e industrianan aki.
Despues di a gradua pa su bachelor’s degree, el a sali rumbo pa Hulanda na 2018 pa por obtene su Master’s degree. Na augustus 2019 el a defende su master thesis titula: “The Road Towards an Innovative Aruba: A Q-Analysis on the Synergy Between the Creative Industry and Knowledge Economy as a Driver to Stimulate Socio-Economic Development in Aruba’s Local Innovation System”.
Cu esaki el a obtene un double Masters of Science degree den “Public Policy and Human Development” na Universidad di Maastricht y e “United Nations University Maastricht Economic and Social Research Institute on Innovation and Technology” cu un specialisacion den Innovacion, Institucion, y Desaroyo.
E tesis aki a hala hopi atencion y interes for di varios academico Hulandes y internacional.
Thaïs ta un miembro activo di Fundacion Go Cultura. Desde juli 2020 e ta un di e presentadonan di e programa “Ban Papia Cultura” produci door di e fundacion aki, pa conscientisa nos comunidad di e balor y potencial di e Industrianan Cultural y Creativo.
Tambe a traves di e fundacion e ta facilita varios curso importante pa empodera y expande capacidad y conocemento di nos creativonan local.
Fundacion Go Cultura ta desea nos colega Thaïs Franken hopi exito durante e conferencia aki. Nos ta convenci cu e lo desplega un trabao magnifico no solamente representando Aruba, pero tambe pa forma alianza y sosten pa asisti nos islanan cu formalisacion y desaroyo di nos Industrianan Cultural y Creativo.
Esaki ta un oportunidad unico pa hiba Aruba su nomber y relevancia riba plataformanan academico di nivel pa asina logra construi brugnan pa colaboracion importande den futuro cercano.
