E ta biba na e cas ey mes unda cu diaranson anochi a mata Daniel Tejada. Polis a detene e sospechoso na e sitio mes y e no tabatin ningun problema pa admiti su culpabilidad tampoco. El a declara na e defensornan di ley cu el a dal e victima cu un stoel den cabes, despues di un discusion cu a presenta entre nan dos. E lo a dal Daniel mas cu un biaha, cu hopi forsa, pasobra pa ora cu paramediconan a yega pa brinda cuido, ya e tabata morto caba. Autopsia lo mester saca afo y confirma con el a muri.
E investigacion aki ta den man di e ekipo di recherche di Oranjestad. A pone e miho recherchenan disponibel pa e investigacion, aunke tur cos ta mustra cu e caso lo cera masha lihe, debi cu e sospechoso principal ta tras di tralie y lo a admiti su culpabilidad caba.
Defensa propio
E asesinato a sosode na cas di “Rufina”, un conoci di husticia. E investigacion ta andando y lo tin varios testigo cu mester bay conta of splica kico tur nan a mira. Tur cos ta indica cu e hoben Gregory Zuleta, di 21 aña di edad, a defende su mes cu consecuencia fatal pa Daniel Tejada di 35 aña di edad.
Testigo ta conta
Segun testigonan, Daniel Tejada a yega na e cas den Pindastraat bou influencia. Daniel ta pareha di Rufina. Rufina cu Daniel ta biba den cercania den un apartament. Door cu Rufina ta poco malo, e ta pasa dia na su mesun cas unda actualmente su nieto Gregory Zuleta ta biba. Daniel Tejeda a yega bebi for di un bar restaurant situa eybanda mes. El a cuminsa causa problema y a pidie pa e bay. Parce mas biaha e ta yega bebi y causa problema. E biaha aki e kiermen ningun hende tin algo di bis’e pasobra e cas ta di Rufina, su pareha.
E asesino tabata e victima
Daniel Tejada a yega bou influencia, rabia, disgusta y mesora a bay den cushina coy un cuchiu. Den henter e bay bin nan a logra kita e cuchiu for di dje y hib’e pafo. El a logra yega bek na un otro cuchiu. Daniel Tejada a bay na cas di bisiña y cu e cuchiu den man y a hasta causa daño na e auto di bisiña. A logra core cu ne y el a bolbe na e cas den Pindastraat. El a expresa den bos duro cu e ta “Daniel el Diablo”. E tabata razo y a bin cu intencion pa hinca Gregory Zuleta. Tabatin coremento tras di otro y dado momento Gregory Zuleta a tira man pa un stoel y a mand’e riba Daniel Tejada pa defende su mes. Parce cu e stoel a hasta a kibra. Djey Gregory Zuleta a coy un pia di e stoel y ta bolbe mande riba Daniel Tejada cu tabata razo cu cuchiu den man. E pia di stoel a dal Daniel den cabes. El a bay atras y cay dal su cabes den pata di e brommer para den cura. Esey parce tabata e golpi mortal! Daniel Tejada a muri na e sitio. Gregory Zuleta a keda para eynan. E no a huy. Ora polis a analisa henter e situacion a bay over na detencion.
No tabatin pelea
Testigonan a sigura na polis cu no tabatin bringamento. Mas bien Daniel, arma cu cuchiu den man, kier a ataca Gregory y cos a caba asina. Testigonan lo ta clave pa sea yuda cu libertad di Gregory of sikiera baha e castigo cu por ser pidi contra dje pa e caso lamentabel aki.
Tocante Gregory Zuleta
E sospechoso deteni den e caso aki ta un hoben, procedente di Pindastraat mes, di Tarabana, Dakota. Gregory Zuleta ta naci dia 19 di februari 2003 y a bishita EPB Hato. Riba su pagina di Facebook ta nota cu e ta gusta brommer y ta masha conoci den su bario Dakota. Na polis nan conoce bon y a yega di cay cera caba den pasado.
Tocante Daniel Tejada
E victima, cu de facto tabata esun cu a yega cas pa busca problema, no ta conoci cerca husticia. Den su file no tin nada poni cu el a yega di cay cera of di a haya un castigo den corte. Loke si a pasa ta, cu e ta un adicto y a sali fo’i bar betra y/of droga yega e cas. E tabata masha agresivo y ta eynan a purba par’e y den e proceso a dal e cu un stoel.
E famia tin e bario terorisa
For di bisiñanan ta tende cu constantemente tin problema na e dos casnan aki, situa net banda di otro na e skina di Pindastraat na Dakota. Den file di polis, ta regularmente ta manda patruya eynan pa pelea of problema. Ta mira cu, separa di problema criminal, cu ey por papia tambe di problema social structura. E situacion ta di tal embergadura cu polis ta pensa di atende cu FCCA pa por muda e famia for di e bario, pa evita mas problema y tambe mas di e tipo di casonan asina, cu por caba hasta fatal.
E caso
Polis a haya un yamada diaranson anochi pa 7:50 pm pidiendo presencia di patruya pa un problema grandi na un cas den Pindastraat na Dakota. Pero pa ora polis y ambulance a yega, ya e victima tabata morto. A detene e posibel asesino y un hende cu a stroba polis di traha eybou. E victima ta Esdras Daniel Tejada, naci dia 7 di januari 1989 (35 aña) na Republica Dominicana.
Prome asesinato p’e aña ‘ki
Nos ta na e di shete luna di aña 2024 y te awo nos a conoce e prome caso di asesinato. Por bisa cu Aruba tabatin e situacion bon bou control. Esaki compara cu otro añanan, unda di inicio di aña caba ta cuminsa raporta asesinato. E reto awo ta pa purba mantene e cifra aki mas abou posibel.
Aña pasa tabatin cuater asesinato
E prome asesinato pa aña 2023 a tuma luga na januari, ora cu a maltrata un homber severamente y cu despues a fayece. A detene dos sospechoso e tempo ey. E victima mes a muri te na maart, pues dos luna despues. E aña a sigui trankil, pero na juli a sigui dos caso tra’i otro; un “drive-by shooting” na altura di ex-United Dinner den Driemasterstraat cu a costa bida di Nayibe Isabel Herrera, naci na Aruba, dia 22 di september 1991, pues di apenas 31 aña di edad. E tabata mama di dos yiu chikito, cu a keda atras sin nan mama. Te dia di awe no a detene ningun hende den e caso aki y a pasa pa bira un “cold case”, E otro asesinato na juli 2023 tabata dia 19 di juli 2023 ora cu e homber Miguel Jose Garcia Moreno di 35 aña di edad, naci na Venezuela, a asesina su pareha, Leila Contreras Romero di 48 aña di edad, den su cas na Washington. Ora el a caba el a bay na altura di Bushiribana y a pone un fin na su mesun bida. E di cuater caso a sosode dia 24 di december 2023 na Matividiri ora cu a mata Sergio Maduro. Na februari di e aña aki a detene e pareha di Sergio y un amigo, sospecha di ta e dos asesinonan. E caso no a bin dilanti ainda.
Asesinato na Aruba
E ultimo añanan, debi na miho trabou di prevencion di polis, combina cu un porcentahe halto di solucion di caso, un di esunnan di mas halto den nos region, a haci cu casonan di asesinato a baha. Cu excepcion di aña 2018 y 2021 cu tabatin un “peak”, mayoria aña e situacion tabata basta bou control. Aruba a percura cu durante pandemia, a wanta crimen asina abou cu no tabatin ningun asesinato, loke pa hopi aña no a logra.
- Aña 2018 – 6 asesinato
- Aña 2019 – 3 asesinato
- Aña 2020 – 0 asesinato
- Aña 2021 – 8 asesinato
- Aña 2022 – 3 asesinato
- Aña 2023 – 4 asesinato
- Aña 2024 – 1 asesinato (te awo)
