Durante e conferencia di prensa di e politico Otmar Oduber, el a bay riba e fase di interogacion di e testigonan cu el a pidi den e investigacion penal contra dje cu a haya e nomber di Flamingo. Un parti grandi di loke ta inclui den e proces-verbaal no ta valido mas, segun el a bisa. E motibo ta cu e testigo principal, un funcionario policial, a fayece.
Recientemente a cuminsa cu interogacion di e diferente testigonan cu el a pidi pa wordo scucha door di Hues Comisario. “For di e poco testigo scucha te cu awo, no por conclui otro cu politica ta meti diki diki den Ministerio Publico di Aruba. Con bo kier pa Ministerio Publico wordo respeta,” asina Otmar Oduber a bisa den un su declaracion.
Di loke a bini dilanti caba, el a menciona diferente cos cu e ta sinti ta un manipulacion, pasobra ta duna instruccion ken pa investiga y kende no, uza contactonan directo di politica cu OM. A manda opdrachtnan directo na e ex-Procurador General, ta uza material di OM pa persigui hende riba opdracht di politica.”
El a conta cu e ta papia di entre otro hefe di departamento cu no a haya na final nada contra nan, pero Departamento di Recurso Humano ta uza e material y informacion ricibi, di forma incorecto, pa persigui e hendenan aki. Ta lamenta cu awe mi tin cu confirma na comunidad cu politica ta meti diki diki den Ministerio Publico. E tabata un berguensa pa e miembronan di Landsrecherche na Aruba.”
Despues cu el a haci su peticion, a warda ocho luna pa scucha e testigonan cu el a pidi y den e proceso ey, un testigo masha importante a fayece. E tabata e funcionario cu tabata hefe di Bureau Criminele Intelligentie (BCI). El a splica cu ta trata di e funcionario cu a traha tur e rapportnan contra di dje, for di aña 2019 ora cu ainda e tabata minister. Ta trata di shete rapport traha door di e funcionario policial y ora cu a yega su turno, a resulta cu el a fayece. “Ta trata di shete rapport yena di mentira, cu informacion falso. OM mes despues di a cuminsa un investigacion, a realisa cu tur e informacionnan no ta cuadra y pa cual a laga tur 7 rapport di BCI a cay afo. Y e base di loke tabata Flamingo no a sigui. Na Hulanda hamas y nunca un hende cu ta wordo sospecha, mester warda cuater aña y mey. A warda ocho luna pa cuminsa cu e interogacionnan. Awo na juli tin reces, e interogacionnan lo caba te na augustus of despues.”
El a cuestiona e echo cu ta tarda 10 luna prome cu scucha testigonan, siendo cu na Hulanda e lo no dura mas cu dos siman. “Pero aki niun hende ta worry.”
