Na inicio di e siman aki a ricibi diferente keho di mayornan preocupa cu no sa ainda ki scol nan yiu lo bay. E ta un situacion fastioso, e mayornan a bisa. Pero 24ora.com a haya confirmacion cu e resultadonan a keda cla.
Manera ta conoci, tur studiante na final di su scol basico, den 6de klas, mester haci un toets via cual ta evalua su nivel di conocemento, y combina cu su puntonan pa mira cual scol e ta pasa bay p’e momento cu e mester drenta enseñansa secundario.
Pero e resultado pa drenta. A tuma contacto cu Departamento di Enseñansa pa mira kico ta e motibo y dia e studiante y famia por spera nan resultado. Durante tres dia largo a yama tur dia y awe, diahuebs, a logra haya e informacion necesario.
E resultadonan awo si a keda cla y ta den proceso pa bay pa e scolnan, segun un funcionario a informa 24ora.com. A informa tur instancia concerni cu riba diabierna, 21 di juni, e resultado ta den man di e personanan concerni.
Nan ta admiti di tabatin un tardansa, cu no ta normal. Pero e tabatin di haber cu un problema interno cu a surgi cu no por a premira, pa cual ta pidi disculpa. Y a sigura cu awo si tur cos ta cla y e studiante nan resultado a bay pa e respectivo scolnan.
Tabata na inicio di e siman aki cu mayor preocupa a pone 24ora.com na altura di e situacion aki. Tabata preocupa pasobra durante algun luna e muchanan a wordo getrain riba e toets cu a tuma luga riba dianan 17 y 18 di april ultimo. A menciona den e carta cu lo haya e resultado dia 4 di juni, pero e fecha a yega y pasa y nada.
“E fecha aki, tanto pa e studiante como e mayornan, tabata importante, maske cu na nos parecer, e ta tarda hopi. Pero ya, nos no por haci nada, y ta di djis warda. Pa nos sorpresa, e dia ey e hoofd di e basisschool, via e jufr di klas, ta informa, cu Directie Onderwijs NO tin e resultado cla. E fecha nobo, ta bira dia 18 di juni. Pa nos sorpresa, un biaha mas, Directie Onderwijs ta informa cu nan NO tin e resultado cla. Esaki ta un decepcion GRANDI. Dentro di poco, (otro siman) tin graduacion y mi yiu no tin NIUN idea di cual scol e lo sigui. Directie onderwijs ta indica, cu ta pa rason imprevisto.” Esaki tabata e preocupacion cu un mayor a manda pa 24ora.com
E mayornan ta haya cu warda dos luna pa ahay resultado ta demasiado tempo y kisas pa den futuro mester modernisa e sistema.
