E echo cu Parlamentario mr. dr. Rycond Santos-do Nascimento a exigi pa su colega Mike de Meza pidi disculpa publico pa a gaña Parlamento y pueblo, a lanta e tension cu semper a existi den seno di e partido color berde. Su demanda a bin despues cu Mike de Meza a bisa publicamente durante un reunion di Staten cu AVP a scoge pa no persigui ex-Minuster Eddie Briesen y cu mas bien tabata persecucion politico di Otmar Oduber.
E declaracion cu a causa tanto problema
E discurso aki di De Meza a causa un daño enorme na partido. No solamente a habri caminda pa e fraccionnan den coalicion, tanto MEP y Raiz a brasa su declaracion y a benta tur culpa di e “deal” awo pa absolve Briesen di e debe personal aki, pero oposicion tambe a uni contra dje. Hasta Otmar Oduber, cu supuestamente a despedi di politica na 2019 a opta pa subi ring bek pa tira mokete riba Mike de Meza. Y locual kisas e no a conta riba dje, cu den cas mes, tanto Gerlien Croes como Rycond dos Santos tambe a sali ataca Briesen y como cu el a para memey, e balanan politico a perfor’e tambe.
Damage control failure
Un dia despues di su discurso den Parlamento, ing. Mike de Meza a purba splica su mes miho durante e noticiero di merdia Enfoke, pero por a tuma nota cu e comentarionan a keda negativo y pueblo a sinti cu el a brasa su amigo di San Nicolas, Eddie Briesen, aunke e sa cu e ultimo aki a faya! Y como consecuencia, su mesun dialuna MEP a bolbe atac’e y Otmar Oduber a presenta personalmente den studio, pa prome bes) pa defende su mes y ataca Mike de Meza cu e berdad.
Awo mester para tras di palabra
Den politica ta dificil practica e wega di “gaña muri”, por lo menos no den e era moderno aki. Ta sinti cu e ultimo susedido politico a pone tur luz atrobe riba e retonan grandi cu Mike Eman tin pa mantene su partido hunto y uni, specialmente despues di eleccion di aña 2021. E division ta mustra, segun esunnan mas cerca di e candela, ta di Rycond Santos, Gerlien Croes y posiblemente Mervin Wyatt di un banda y na e otro banda e ex-ministernan Benny Sevinger, Mike de Meza y Arthur Dowers. E lider, mr. Mike Eman, ta memey y awe mester hunga hues entre e dos bandanan pa mira ken ta keda of ken ta bay. Aunke e ta parce facil, e no ta…pasobra e por nifica tambe final di e partido. Rycond Santos a los un peticion publico demandando disculpa di su colega, locual ta haci cu ta keda dos opcion riba mesa…sea Mike de Meza ta pidie pordon of sino e tin cu saca su conclusion!
Midimento forsa di e nobonan
E “generacion nobo” den partido ta sinti falta di transparencia, di participacion real, di mas encuentro pa determina ki posicion partido ta tuma riba varios tema, etc. E generacion cu mas experencia ta convenci cu e hobennan falta mas compromiso, inverti mas ora den politica, etc. De facto, e tres parlamentarionan ex-minister hunto ta representa 4201 voto pa e partido, mientras cu e hobennan hunto ta cera unicamente 2713 voto. Nan forsa sin duda ta Gerlien Croes cu 1919 voto den e eleccion di dos aña pasa y cu tin hopi posibilidad pa sigui crece. Si ta pa voto, e ta e di dos vote getter di AVP den eleccion di 2021. E ta un di e uniconan cu a crece den e ultimo eleccion. E lider, vote getter di e partido, Mike Eman, tin 6668 voto individual, aunke el a bay atras. E tin cu hunga referee awo entre e dos ekiponan batayando pa gol, solamente cu tur dos team ta di e mesun liga!
E factor Gerlien Croes
No ta un secreto cu Gerlien Croes ta keda un arma potente den seno di partido AVP y sin dje, e partido lo keda cu un bashi na voto y presencia di e hende muhenan. E ta di e dos politico den e partido cu mas voto, pues despues di un solo eleccion den politica, el a pasa tur e ex-ministernan den popularidad y den voto. Ta hasta teme cu e lo kier yega riba e posicion di lider, pero el a splica su coleganan na varios ocasion cu esey no ta su anhelo, ainda. Ta parce cu, aunke cada un tin kehonan diferente riba liderazgo di partido, cu toch nan ta uni den e lucha aki pa “shake” e fundeshi di partido pa mira si ta bin cambio.
Awe ta un pa tera un pa lama
No tin un orario fiho pa e reunion ainda, pasobra a papia di un reunion mainta y despues a cambia e ora pa “mas despues”. Liderazgo di partido AVP ta bou presion pasobra awe nochi tin “Partijraad” y ey miembronan lo puntra sigur kico ta pasando, dicon dos parlamentario ta sali ataca otro publicamente asina y dicon tin un guera publico asina entre “bieu y jong”. Lider di partido lo tin pregunta pa contesta, pues ta esencial pa e reuni cu tur e actornan prome cu topa directiva di partido, pasobra sino e discusion lo tuma luga eyden, cu tur consecuencia cu esey lo trece cu ne pa e partido mas grandi den oposicion. Esunnan yega na e candela ta kere cu tra’i merdia lo sinta y discuti internamente entre e shete parlamentarionan pa mira si por y con ta sali di e impasse cu semper a existi, pero cu awo a bira publico.
Pa e articulo completo, lesa e edicion di TREMPAN di awe.
