E presidente di Ucrania, Petro Poroshenko, a firma awe un decreto unda cu e ta declara e estado di excepcion den henter e pais tras e apresamento diadomingo di tres barco di e Armada Ucraniano di parti di Warda Costa Ruso den Lama Preto cerca di Krim.
E estado di excepcion lo ta na vigor te cu dia 25 di Januari di e proximo aña, aunke e por wordo lanta den cualkier momento, segun e Conseho di Siguridad Nacional y Defensa di Ucrania a splica.
E decreto presidencial aki, cu no ta supone obligatoriamente e mobilisacion di e tropanan, ainda mester ricibi e bon bista di e Rada Supremo of Parlamento.
Petro Poroshenko, kende a firma e decreto tras di a combersa cu e secretario general di NATO, Jens Stoltenberg, tambe a precisa cu e estado di excepcion no ta supone e introduccion di shortcuts na e derecho y libertadnan fundamental di e ciudadanonan.
E secretario di CSND, Alexandr Turchinov, a propone e estado di excepcion cu e fin di crea e condicionnan pa repela un posibel “agresion militar” y cualkier menasa na e independencia y integridad teritorial di parti di e pais bisiña.
Di su parti, e minister di Asuntonan Exterior Ucraniano, Pavlo Klimkin, kende a tacha e apresamento di e barconan Ucraniano di “acto di agresion,” a sigura cu “Ucrania lo busca un areglo pacifico na e contencioso… aunke, sin duda algun, e ta reserva e derecho na autodefensa, den virtud di e articulo 51 di e Carta di Nacionnan Uni.”
E minister di Exterior Ruso, Serguei Lavrov, a critica awe e plannan di Ucrania di impone e estado di excepcion y a yama e socionan occidental di Kiev na “calma” e autoridadnan Ucraniano.
Mientras e Canciyeria Ruso a expresa su “firme protesta” pa e comportamento di e Armada Ucraniano, na cual el a acusa di escenifica un provocacion pa instiga e tension den e zona y conmina Occidente na impone sancionnan nobo contra Rusia.
Rusia a admiti di a tira diadomingo atardi, riba e barconan Ucraniano den su awanan teritorial cerca di Krim cu e fin di obliganan pa detene, aunke Ucrania ta mantene cu e atake a tuma luga den awanan neutral y ora cu su barconan ya tabta nabega di regreso pa e puerto di Odessa den Lama Preto.
Esey a sosode despues cu Moscu a dicidi pa cera e Estrecho di Kerch pa impedi e acceso di barconan Ucraniano den e lama di Azov.
Poroshenko a exigi awe e dirigentenan Ruso e liberacion “inmediato” di e tripulantenan di e tres barconan apresa – e lanchanan artiya “Berdiansk” y “Nikopol” y e remolcador “Yani Kapu”, cu ta wordo interoga pa e forsanan di siguridad Ruso.
E Defensor di Pueblo Ruso, Tatiana Moksalkova, a informa cu tres di e tripulantenan herida, ora cu e Warda Costa Ruso a tira riba e barconan Ucraniano a wordo hospitalisa.
