Minister di Turismo y Salud Publico Dangui Oduber ta informa comunidad cu e resultadonan di turismo pa e prome 5 lunanan di aña 2024 a drenta. A caba di ricibi e resultadonan di luna di mei 2024 y por nota cu e tendencia di crecemento y demanda grandi pa Aruba ta continua.
A ser demostra cu analisis cu e demanda pa Aruba ta keda un di esunnan mas halto den henter Caribe. E indicadornan cu ta midi e exito di turismo ta confirma esaki.
Minister Oduber a bisa di ta satisfecho con luna di mei 2024 a cera cu resultadonan positivo. Mei 2024 a ricibi 111.180 bishitante cu a drenta Aruba cu ta un 16.6% den crecemento. E prome 5 lunanan di aña 2024 (jan-mei 2024) Aruba a registra un crecemento di 18.7% vs e prome 5 lunanan di aña 2023 cu porcierto tawata e miho aña den historia di turismo pa pais Aruba.
“Nos mercado principal cu ta e mercado Mericano a registra un crecemento di 17% e prome 5 lunanan di aña 2024 vs 2023 cu ta un crecemento impresionante. Turistanan ta keda satisfecho cu Aruba y ta clasifica e “GuestExperience” cu un 9.0. E categoria cu a wordo clasifica mas halto, ta: ambiente cu 9.4.”
Loke ta mas remarcabel ta e echo cu turistanan ta gastando mas placa y lagando mas placa atras den nos economia.
Durante e prome kwartaal di aña 2024 turistanan a gasta un averahe di $666 pa cada turista. E gasto aki ta wordo midi for di nan creditcard di Visa. Esaki a suma un total di gastonan registra di usuarionan di visa credit aki na Aruba di $185.095.875.
Ta pa remarca cu e prome kwartaal di 2024 ta uno hopi positivo pa Aruba.
Loke tambe ta importante pa menciona ta e echo cu durante e prome 5 lunanan di aña 2024, un 31% di turistanan stay-over a hospeda na un vacation rental. Aki minister Oduber a subraya e importancia pa regula e sector aki mas pronto cu ta posibel y ta contento cu e legislacion ta na Raad van Advies actualmente.
Pa conclui, Minister Oduber a bisa di ta satisfecho cu Aruba ta keda un destinacion precioso cu demanda halto pa hopi bishitante den Caribe. Resultadonan ta demostra cu keto bay tin cifranan halto pa confirma e bon maneho.
Minister Oduber kier a gradici tur partnernan di turismo pa e resultadonan positivonan aki. E ta confirma cu e maneho cu ta ser hiba ta uno efectivo, treciendo e turista afluente cu ta contribui na e spin off economico di turismo. “Danki na cada un persona laborando den e sector turistico, ban sigui demostra nos cordialidad y duna e hospitalidad na nos bishitantenan cu nos ta conoci pe.”
