Un señora cu status ilegal na Aruba ta deteni awor, despues di a nenga instruccion di Polis pa para e auto pa un control y a causa un persecucion. E motibo ta cu e tabata trahando como Taxi Pirata, riba e ruta di Noord pa Oranjestad. El a core duro pa Polis, trece trafico den peliger pero tambe e pober pasahero cu a pasa den un berdadero susto di su bida.
Tabata algo pa 1’or di merdia ora cu Polsi di Bario a nota un auto marca Hyundai modelo i10 color blauw cu number A-48102 a para pa un hende homber subi, na altura di Ponton. A dicidi di bay par’e pa controla si ta e trabou di Taxi Pirata e ta eherciendo.
E persecucion a dura basta largo, te ora cu Polis a logra para e auto completamente den Klipstraat na altura di The Driftwood Restaurant. Ey e chauffeur, un señora procedente di Venezuela, a admiti cu el a core pasobra e ta ilegal y no kier regresa su pais bek.
E pasahero a conta Polis cu e tabata para banda di caminda na Ponton wardando bus. Dado momento e auto a para y ofrece lift. Den auto e señora a menciona cu e mester paga pa e “cabes di boto” y precisamente e momento ey el a scucha sirena di Polis y e “taxista” a cuminsa core duro. El a puntre kico ta pasando y e señora a bise pa e bula for di auto. El a haci esey tambe y a rasca tur su curpa den e proceso.
E caso awor ta bou investigacion, e chauffeur deteni y e auto den beslag.
