Aña 2023 tabata hopi bon, yena cu hopi reto pero toch bon. Asina un dama a contesta nos team di redaccion cu a subi caya puntra turista- y e localnan kico ta nan deseo p’e aña nobo.
Algun turista a bisa nos cu nan meta ta pa sigui cumpli nan soñonan, y sigur un di e metanan tabata pa conoce Aruba. “Boso tin tradicionnan hopi bunita y unico, boso tin un ciudad hopi bunita. Y asina mi kier sigui cumpli mi soñonan, sigui biaha y conoce mas luga asina ki.”
Un otro dama ta desea henter pueblo di Aruba un prospero 2024 mirando cu Aruba a habri nan porta pa esunnan di exterior cu tabata busca oportunidad pa crece. “Aruba, danki pa tur cos, y p’e 2024 aki trece hopi bendicion pa tur Arubiano y stranhero, feliz aña nobo.”
E metanan pa 2024 ta keda grandi pa hopi hende manera un dama cu a bisa nos cu p’e aña aki e kier logra haya su propio cas. “Mi ta kere na Aruba nos ta sigui crece y nos ta sigui innova. Mi ta kere esey ta algo cu semper nos tabata bon den dje, y mi ta kere nos lo ta miho cu 2023,” e dama ta bisa nos.
Pa esunnan cu kisas no ta sinti nan mes mucho bon of positivo, e mensahe ta bay cu semper ta okay pa sinti un poco ‘down’ pero zorg bo cuminsa cu stapnan chikito, y logro chikito pa bo yega na bo metanan. Comerciantenan tambe cu nos a acerca a felicita nos pa nos premiacion di website di aña, y tambe comparti cu 2023 a bay bon. “Hopi trabao, hopi cliente nobo, y 2024 nos ta ripiti e formula mesun cos.”
Un ciudadano local su mensahe pa 2024 tabata hopi cla y raspa: “Biba trankil. No rush, no stress, paso stress ta haci hopi daño. Biba relax, pasobra ta un bida so nos tin, no complica bida pa nada!”
