Ora nos ta yega den asuntonan di Dios, no tin cuenta si nos kier si of no, pero dia cu tempo lo mustra cu nos mester.
Pasobra esun cu kere lo ta salba, y esun cu no kere lo ta condena, y ta hende mes lo sa si ta sigui biba bao di condenacion y furia di Dios, y nan ta opta pa kere den Cristo Hesus pa salbacion.
Tin hopi hende grandi ta haci cos di mucha, y biba den desobediencia, inmoralidad y malicia. Pero e palabra di Dios ta bisa cu tur rudia mester dobla y tur lenga mester confesa cu Hesus Cristo ta Señor.
No ta bay cuenta bo kier of bo no kier, pasobra si bo no kier bo destinacion lo ta pa condenacion (fierno).Salbacion ta personal.
Pero si bo dicidi di pone terkedad, capricho, malicia, un banda y acepta e plan di salbacion cu Dios ta ofrece ( Juan 3:16-21) e ora ey bo bida lo tin speransa y lo bo no tin cu enfrenta (Juan 3:36).
Pasobra awor si nos a drenta e tempo cu esun cu no kier tende, y obedece, e mes por visualisa na unda e ta bay termina.
E tempo di papia suave a pasa, e tempo di hunga mucha chikito a pasa, Apostol Pablo a skirbi y bisa : tempo mi tabata mucha, mi tabata haci cos di mucha, y tempo di cos di mucha a pasa,(1 Corintionan 13:11) pasobra satanas, no ta haciendo cos di mucha, su plan di destruccion ta bisto pa tur hende.
Si nos sigui tapa cos, bira lomba pa pica, apoya inmoralidad, y abominacion, sin bisa nada, nos ta complice, mescos cu un mayor cu ta permiti su yiu sconde cos horta den cas, of un mayor cu ta permiti su yiu y su amigonan bin uza droga den cas.
Dios den su palabra a duna nos advertencia pa no hiba un bida di mentira of un bida condenabel.
Den Romanonan 12:1-2 ta para skirbi: P’esey mi ta roga boso rumannan pa medio di e misericordianan di Dios,pa presenta boso curpanan como sacrificio bibo y santo, aceptabel pa Dios, cual ta boso sirbishi spiritual di adoracion. Y no sea conforme e mundo aki,ma sea transforma pa medio di renobamento di boso mente,pa boso por comproba, kico ta e bon y agradabel y perfecto boluntad di Dios.
Den Romanonan 1:28-32 ta pa skirbi: Y mescos cu nan no a haya necesario pa reconoce Dios, Dios a entrega nan na un mente perverso.Pa haci cosnan cu no ta cumbini.
Romanonan 16:17 ta bisa nos: Awor mi ta roga boso rumannan tene na bista esnan cu ta causa division y strobacion contrario na e siñansa cu boso a haya y aparta boso for di nan.
Pasobra sorto di hende asina ta esclavo:No di nos Señor Cristo Hesus, ma di nan mes un apetit; y cu nan palabranan suave y agradabel nan ta gaña curason di inocentenan.
Colosensenan 2:8 ta para skirbi: Mira pa ningun hende no cohe boso preso door di filosofia, y engaño bano, segun tradicion di hende, segun e principionan elemental di mundo. Y no segun Cristo.
Dios a crea hende den su imagen y semehansa, homber y muhe el a crea nan, esey ta tur cos , si tabatin otro variacion, for di principio Dios lo a haci esey conoci na mundo.
P’esey den Mateo 13;36-42 Hesus ta splica bon cla kico a pasa riba e mundo aki pa hende no cay den trampa di mentira.( No lubida locual ta para skirbi den Juan 3;36).
Sinceramente Pastoor Marcel Balootje.
