Nos ta bibando den tempo trabahoso, caminda malo ta apoya como bon. Inmoralidad ta transmiti como informacion y enseñansa, perversidad ta yama moda. Impuresa ta disfrasa den un forma di biba. Tur esakinan ta forma parti di e nubia scur cual diabel kier cubri mente di esunnan cu no kier tende y somete nan bida completamente na Cristo Hesus.
Ta tempo pa predica e evangelio cu e maximo claridad di expresion posibel, pasobra nos Señor nunca a uza palabra bunita pa convence hende. Pero Hesus a bisa tur cos manera nan ta, y ta keda na e persona si e kier tende of no.
E tempo cu ta falta pa e binida di Cristo ta hopi cortico, y no ta tempo pa yaya hende mas pero ta tempo pa bisa e berdad, pasobra lo bo sa e berdad y berdad lo haci bo liber.
Hopi biaha bo ta tende mayornan bisa cu nan no por forsa nan yiunan pa bay cas di Dios, sea misa, iglesia, tempel etc. Pero e diabel si ta ranca nan bay caya cu ne. Hinca nan den paranda y buracheria.
Ta uza tur clase di droga. Bruha nan mente pa nan bende nan curpa.
Domina na bida cu habito robes asina cu nan ta bira sin identidad, y sali completamente for di locual ta e boluntad di Dios pa nan bida. Hinca nan den gang y asina nan ta bira criminal tempran den nan bida.
Mientras cu nos como mayor kier bay suave, pa evita discusion, e enemigo ta hala nos yiunan bay cu ne.
Hesus papiando den Mateo 18:5-6 ta bisa: Y ken cu ricibi un mucha asina den Mi nomber, ta Ami e ta ricibi. Ma ken cu haci un di e chikitinnan aki , cu ta kere den mi trompica, ta miho pe cu un piedra di molina pisa wordo colga na su garganta y cu e wordo hoga den profundidad di lama.
Aki nan tur hende mester realisa, kico ta e consecuencia pa esunnan cu pone piedra di trompica den caminda di muchanan, Pasobra esaki no ta opinion di hende, pero ta palabra cu Cristo Hesus mes a bisa, y esun cu ta rechasa palabra di Dios, Dios tambe lo rechas’e.
El a coy un mucha y pone para memey di nan, y ora cu El a tum’e den su brasa, El a bisa nan: Ken cu ricibi un mucha manera esaki den Mi nomber ta Ami el a ricibi, y ken cu ricibi Mi, no ta Ami el a ricibi, sino esun cu a manda Mi (Marco 9:36-37).
E yiunan ta herencia di Señor, e fruta di barica ta un recompensa (Salmo 127:3). Mira pa boso no desprecia un di e chikitinnan aki, pasobra Mi ta bisa boso cu nan angelnan den cielo, continuamente ta contempla cara di Mi Tata cu ta den cielo (Mateo 18:10).
Ta dolor pa mira con r hobennan awendia ta bay den caminda robes, cana cu arma, comete crimen y hasta kita nan propio bida. Ta tempo pa nos no wak mas ken ta ken, tampoco yiu di ken, pero cada mucha ta importante pa Dios.
Ta un tristesa ora nos tende hende papia y bisa con droga mester ta legalisa, y nan sa masha bon cu e victima mas grandi lo ta nos muchanan.
Ta tur sorto di bagamunderia e enemigo ta purba riba nos muchanan, pero nos tin di corda cu nos como mayor mester ta responsabel y guia nos yiunan den e caminda di berdad y bida, cual ta e caminda di nos Señor Hesus Cristo.
Dios yuda nos,
Sinceramente,
Pastoor Marcel Balootje.
