Na september proximo hues lo dicta un sentencia den e caso di empleado publico cu Haime Croes, director di Directie Infrastructuur en Planning (DIP), a entama contra Prome Minister Evelyn Wever-Croes y Gobierno di Aruba. E ta buscando pa haya su funcion bek y pa e por reaunda su trabou. E ta sinti cu gobierno pa trat’e di un forma inhusto.
Gobierno di Aruba a haci uzo di su mesun huristanan pa defende su maneho y decision, mientras cu e director suspendi a haci uzo di e bufete di abogadonan Brown Lawyers y den corte a conta cu asistencia legal di abogado mr. Eugene Martis.
“No comments”
“Mi ta prefera di no comenta riba e caso. Ban spera na september pa e sentencia di hues prome. Despues eventualmente mi lo por dun comentario”, asina Haime Croes a reacciona riba nos yamada, buscando su reaccion despues di tratamento di e caso.
Silencio tambe ta un contesta
Echo ta cu, te dia di awe, Prome Minister Wever no a tuma un decision riba e investigacion disciplinario haci. A laga Croes suspendi pa mas di un aña caba, cu legalmente no ta posibel. Normalmente despues di un suspension largo asina, cu si a haya motibo valido pa e suspension y si di berdad a haya cualkier asunto cu ta confirma nan sospecho riba mal maneho y/of falta di integridad, e ora lo a pidi pa su retiro. Como cu ainda no a haci esey, ta sea cu e investigacion no ta cla ainda of cu Gabinete Wever-Croes II no ta cla of no ta sigur di e conseho di DRH y como tal no a tuma un decision final.
Un aña na cas
Desde inicio di luna di mei di aña 2023, Prome Minister mr. Evelyn Wever-Croes, cu alabes ta Minister di Infrastructura, a duna Haime Croes prohibicion pa drenta edificio di DIP, pa un investigacion disciplinario. Un investigacion asina por dura seis siman y gobierno por prolonga cu seis siman mas, pues na tur por yega na un maximo di 12 siman, o sea tres luna. Pero awo ta mas di un aña pasa, cu ainda e director di DIP ta na cas, cobrando, pero sin por funciona.
Tempo cu a suspend’e
Tabata den fin di siman, net prome cu e mester a cuminsa traha bek dialuna, despues di algun dia di vakantie, cu a mand’e un carta na cas den cual a inform’e cu tin un investigacion disciplinario andando contra dje, debi na varios iregularidad, keho of descubrimento haci eyden rond di su maneho como director di DIP.
Investigacion disciplinario
E investigacion andando no ta penal, sino disciplinario, conduci pa Departamento di Recurso Humano (DRH) mes. Ta papia di varios asunto pareu, entre otro di e mesun acusacionnan rond di Cucuisa, di terenonan na Malmok/Arashi y varios otro asunto mas. Interesante ta cu durante tratamento di e caso, e representante di DRH den corte a bisa hues cu nan ta haya ordo directamente di Prome Minister di cua ambtenaar nan mester investiga. Esey lo a hala masha atencion durante tratamento di e caso.
DIP tin economia di Aruba secuestra
Como consecuencia di e decision di Gabinete Wever-Croes II pa no mete den otorgamento di tereno door di podera e director di DIP mes pa tuma e decisionnan aki, awo practicamente ningun tereno no ta sali mas. Haime Croes a dicidi di cera tur porta y, sea deliberadamente of sin cu el a realisa, a stanca henter nos economia. Ningun tereno tabata sali, ni pa local ni pa stranhero. Proyectonan a keda paralisa y banconan ta preocupa pasobra inversionistanan cu placa den man, ta cana bay otro pais debi cu na Aruba nan no por haya tereno pa desaroya. Hasta parlamentarionan di MEP a sali publicamente ataca DIP y maneho di e director, pero ni esey a yuda pa crea movecion of cambio di maneho.
Tocante Haime Croes
Ing. Rigoberto Croes Phd, miho conoci como Haime, tin dos titulo. El a studia pa ingeniero na Hulanda y despues a logra su PhD den turismo. E titulo di PhD ta para pa “Doctor of Philosophy” ta un titulo comun na e nivel academico di mas halto. Prome di cuminsa traha como director di DIP, e tabata duna les na Instituto Pedagogico Arubano (IPA).
Haime Croes ta na cabes di DIP desde dia 1 di januari 2019, nombra door di Minister Otmar Oduber. For di momento cu el a asumi e funcion, mesora a haci tur lo posibel pa baha e tempo cu ta warda pa tereno, aumenta eficiencia y garantisa un servicio husto y di integridad halto bou di e coleganan. Den e proceso por a nota un cambio di 180 grado den maneho di tereno, den cual regularmente ta emiti cantidad di terenonan individual pa pueblo por construi nan mesun cas.
Tambe a señala cu durante e proceso pa structura e servicio cu enfoke riba integridad, a start investigacion contra varios empleado. Un grupo di nan ta na cas, pendiente e investigacion riba posibel iregularidad pa cu e forma con nan ta procesa terenonan.
