Diabierna mainta y na ocasion di Dia di Enseñanza, tabatin un ceremonia na sede di Sindicato di Maestro di Aruba (SIMAR) pa devela un plakkaat den e patio na nomber di defunto Madonna Stephens. E docente tabata, fuera di un di e fundadonan di e sindicato, tambe un baluarte den sector di enseñansa riba nos isla, segun drs. Jose Fernandes Perna a duna di conoce. E idea di dun’e honor aki a bin cinco aña pasa for di e propio Fernandes Perna durante e despedida fisico di Stephens. “Esey nos a haci awe pa asina keda den memoria di esunnan cu no conoce,” su colega y amigo a expresa.
Madonna, for di e temponan ey y te awo, por sigui den nos memoria colectivo pa ki tipo di persona e tabata y kico el nifica pa enseñanza den su totalidad. Fernandes Perna a conoce Madonna na 1974 ora el a bira miembro di VLA cu despues a bira SIMAR. Despues cu el a bay Hulanda pa sigui su estudio na 1977, Madonna a tuma presidencia e tempo ey ya caba di SIMAR y ora el a bolbe na 1984, el a termina su presidencia.
“Pero tanto prome cu e periodo cu e tabata presidente Madonna tabata sumamente activo como miembro di directiva y despues di esey tambe. Tur e añanan despues, e tabata miembro principal encarga cu e comision di enseñanza caminda ami cu ne tabata traha na nomber di SIMAR.” Tambe nan tabata colega den dos comision: esun pa restructura enseñanza na Aruba en general y particularmente werkgroep opleidingsherstructurering. Esey ta ora cu a pasa APA pa IPA cu nos conoce awendia. Semper a traha for di IPA na e diferente proyectonan di enseñanza cu tabata e propio IPA, pero tambe EPB, EPI, SHA y PRIEPEB, asina Fernandes Perna a splica.
Na momento cu por a duna contribucion basa riba propio concepto y ideanan cu no ta keda solamente local, pero tambe si e ta bin di Hulanda of unda cu ta, ta sali for di e punto cu mester evalua ki impacto e tin y si e ta positivo pa nos sistema di enseñanza. Tabata determina esey y a yega na implementa esey.
Segun e ex colega, Madonna tabata un persona semper dispuesto pa contesta pregunta sin cu e tin un proposito personal, pero semper pa enseñanza. “E tabata cla pa duna bo un man y si abo bin cu un idea cu no ta cuadra cu su pensamento, e ta bay den dialogo cu bo. Pero dicon? Pakico? Pensa riba esaki…,” Fernandes Perna ta recorda.
Su trayectorio, no solamente como docente di Ingles, pero tambe cu a sigui diferente curso di pedagogia, di ley y su experiencia amplio den enseñanza, ta surpasa sigur un 50 aña di carera. El a pasa den tur e desaroyonan ey y e tabata duna conseho di unda tambe abo por a contribui na sigui innova nos sistema di enseñanza.
“E ex presidentenan di SIMAR; for di e generacion di nos te na esunnan mas hoben, ta importante pa esaki ta den e memoria colectivo y ohala por yega na documenta paso e material t’ey,” Fernandes Perna a reflexiona. E ta bisa cu si bay rondia, por trece diferente topico cu algun di nan ta implementa caba den enseñanza, pero otronan lamentablemente pa falta di decision politico no ta ehecuta ainda.
“Awo cu e no ta rond di nos mas, pero si su legado, e generacion nobo carga e pensamentonan aki, mi ta kere ainda su contribucion lo ta inmenso pa loke ta sector di enseñanza. Como sindicalista, e ta conoci na Aruba, pero na nos islanan ruman, Corsou, Boneiro y tambe Hulanda conoce e persona di Madonna Stephens tambe.”
