Un estudio publica dialuna pa The Lancet, ta confirma e prome caso di reinfeccion pa Covid-19 detecta den un pashent di Merca, loke ta sugeri cu e exposicion na e virus no ta traduci necesariamente den e inmunidad total.
Na nivel mundial ta trata di e di cinco episodio confirma di reinfeccion, di acuerdo cu e publicacion.
Verifica mediante un secuencia genetico, un pashent di Nevada a sali positivo pa dos infeccion di SARS-CoV-2 den un plazo di 48 dia, loke a confirma, segun e estudio ta subraya, cu un di dos infeccion por sosode den un periodo cortico for di otro y cu por ta mas grave cu esun prome.
E hallazgonan revela ta mustra tambe cu e exposicion na Covid-19 por ta no traduci den un garantia total di inmunidad aunke, relaciona na e punto aki, e estudio ta adverti cu ainda ta necesario investiga mas e casonan di reinfeccion.
De e periodo aki di reinfeccion pa coronavirus – e prome identifica den e pais ey – expertonan a haya evidencia di un individuo, sin problema inmunitario conoci ni problemanan medico adicional, infecta cu SARS-Co-2 dos biaha separa di otro.
E pashent, di 25 aña y residente di Washoe County (Nevada) a infecta cu dos variante di Covid-19 den un periodo di 48 dia y a sali negativo entre ambos incidente.
E di dos infeccion tabata mas grave cu e prome y mester a hospitalis’e y a sigui un tratamento cu oxigeno.
Autornan di e estudio ta alerta cu independientemente si a diagnostica anteriormente of no pa Covid-19, mester adopta precaucionnan identico pa evita contagio.
Segun The Lancet, despues di a sali positivo pa coronavirus na april, e pashent a sali negativo den dos ocasion diferente, pero na juni, despues di a sinti sintomanan grave asocia cu e virus manera keintura, dolor di cabes, mareo, tosamento, nausea y diarea, a hospitalis’e y a sali positivo pa di dos biaha.
Desde e momento ey, ya el a sali for di hospital y a recupera di e di dos infeccion aki.
Expertonan ta considera cu “ta importante pa tene na cuenta cu esaki ta un hallazgo singular y no ta proporciona un generalisacion di e fenomeno aki.
“Mester di mas investigacion, e posibilidad di reinfeccion por tin implicacionnan significativo pa nos conocemento di e inmunidad di Covid-19, specialmente den ausencia di un vacuna efectivo,” a bisa.
Ta agrega cu “individuonan cu a sali positivo pa SARS-CoV-2 mester sigui adopta precaucionnan serio ora cu ta trata di e virus, manera mantene distancia social bisti mondkapje y laba man.”
Por lo menos a detecta otro cuater caso di reinfeccion di e virus na nivel global na Belgica, Hulanda, Hong-Kong y Ecuador, aunke solamente den e caso detecta den e ultimo pais aki, e di dos episodio di reinfeccion tabata pio cu e prome.
Onderschrift potret: Ta confirma e prome caso di reinfeccion pa Covid-19 na Merca. EFE/EPA/ROLEX DELA PENA
