Un problema cu ta parce di no bay caba nunca mas. Un mama a pone su mes un yiu y su pareha porta afo un biaha mas. Na e cas aki na Soledad, Noord no ta prome biaha polis ta presenta y no lo ta ultimo tampoco.
Den careda di 1:00 pm a pidi presencia di polis cu urgencia na un cas na Soledad pa un problema di famia bayendo completamente for di man. Patruya di Noord y di Playa a presenta mesora. E adres ta conoci pa nan. A bin topa un situacion cu a cuminsa calma caba pero algun hende ainda basta altera.
Na dicho adres ta conoci pa tin problema di famia, pelea, bringamento pero na yegada e situacion tabata bou di control. A resulta cu e suegra no kier mira su nuera den su cas, cu tabata e causante di tur e discusion. Cos a bira zuur na momento cu e yiu homber a cana yega cu e nuera n’e cas.
Polis a interveni y pidi e yiu pa bandona e cas cu su pareha, cu no ta bonbini na e cas. Nuera tabata na yoramento pasobra su suegra no kier mire den su cas. Di otro banda polis tambe a purba papia cu e señora mama, cu ta doño di e cas, pa asina calma e situacion. Afortunadamente ningun hende a resulta herida y aunke polis a presenta cu transporte policial, esaki no tabata necesario mirando cu no a detene ningun hende na e sitio.
