Dialuna atardi, aproximadamente 4:30 pm ta pidi presencia cu maximo urgencia di ambulance den area di Highrise Hotel na Palm Beach pa un caso serio di accidente riba lama.
Na yegada, na e pasada entre Barcelo y Hilton Hotel, a tuma nota di tanto polis como voluntarionan den esfuerso maximo pa brinda e prome auxilio mientras tabata den espera di ambulance. Persona na sitio a bringa duro pa keda duna e victima CPR tanten cu ambulance tabata na caminda.
Tension tabata basta halto, turistanan di otro banda no tabata contento cu presencia di prensa y tabata haci e trabou un poco dificil pa trece tur informacion. Polis a tene mirones na un distancia pa duna espacio pa personal di ambulance, cu mientrastanto a presenta, pa traha cu e victima.
Locual cu por a compronde, cu riba lama lo a pasa un accidente riba waverunner y cu e persona femenino aki lo a cay y no tabata reacciona. A yega beach transporta den un boto y for di akinan tur esfuerso tabata pa reanima e dama aki bek na bida.
Ambulance a transport’e pa hospital y te na e momento aki no a ricibi update di autoridad riba su situacion.
