Diaranson atardi a tuma luga un conferencia di prensa di gobierno. Aki ta caminda cu drs. Raymond Knops, Secretario di Estado demisionario hunto cu Prome Minister di Aruba demisionario, Evelyn Wever-Croes a hiba palabra.
Nan tabatin un reunion masha cortico. Knops ta na Aruba pa un bishita di trabou. Esaki ta su ultimo trip di trabou como secretario di estado, mirando cu na Hulanda ainda nan ta den e proceso di formacion di un gobierno nobo. Wever-Croes a desea Knops exito den su futuro como politico y alabes a gradicie p’e cooperacion brinda durante e ultimo 3 aña y 9 luna.
Di otro banda, Knops a felicita Wever-Croes cu e resultado di eleccion y a elogia e forma con el a sa di maneha e crisis cu Covid-19 a trece cu ne. Knops a subraya riba e importancia di un bon relacion den Reino, di cual tabata e caso tambe entre su persona cu Evelyn Wever-Croes.
CUMPLIMENTO
Drs. Raymond Knops a menciona durante e conferencia di prensa cu, si gobierno di Aruba no cumpli cu e palabracionnan stipula den e Landspakket, cu esaki por tin un influencia pa cu e fondo cu Aruba lo ricibi na cada tranche, cu por cierto ta cada kwartaal.
BAHAMENTO DI GASTO
Knops a menciona cu e ta nota cu e gabinete actual a tuma cierto medida caba relaciona cu e bahamento di gasto pa cu empleadonan publico. Tin acorda si cu, pa november 2021, lo mester reorganisa henter e sistema di LMA, di cual algun ambtenaar tin posibilidad di perde trabou. November ta leu ainda, segun Knops. E ta acorda si den e landspakket cu mester bin cu un reforma den e trahamento y pagamento di funcionario publico, na final e meta ta, pa baha gasto. Wever-Croes a menciona tambe cu, el a ricibi un carta di e sindicatonan, caminda nan ta boga pa participacion den henter e asunto di Landspakket. “Te ainda no tin un rol pa nan, pero asina ta e momento, nos lo yama nan”, asina Prome Minister Evelyn Wever-Croes a menciona.
