Diabierna anochi a tuma luga un evento di Pasco masha bunita mes den cura di Filomena College Mavo na San Nicolas. E evento a carga e nomber “Taste of Christmas”. Raquel Lampe ta cabesante di Filomena College, durante un entrevista cu representante di Headlines Group, kende ta e cas editorial di 24ora.com y TREMPAN el a conta cu e anochi ta den cuadro di e materia Spaño.
Ta trata di studiantenan di klas 3. Como tarea mester a organisa e evento door di bende cuminda di diferente pais. Cada grupo a haya nan tent y a bende cuminda di diferente pais manera indica. For di jhonny cake di St. Maarten pa sop’i cabrito di Boneiro pa bami cu pinda sauce di Surnam y mucho mas.
E studiantenan mes tabata encarga pa busca sponser y traha nan menu. E publico tabata masha contento cu e evento door di asina hopi variacion di cuminda y bon smaak. Apart di esey tambe tabatin un bazaar caminda a bende buki, mata y diferente arte traha na man. E tabata un anochi di famia y cu e spirito di Pasco.
E ta un temporada masha bunita mes y tin cu disfrut’e. Na final e studiantenan ta ricibi un punto pa cu nan proyecto, e ta e proyecto final pa e materia di Spaño pa e aña aki. Adicional tambe a mira varios ex-studiante cu tambe a presenta pa mustra nan sosten n’e evento.
E evento aki ta sirbi fuerte como ‘organisatie en leiding’, bo tin cu traha den grupo y tin comunica hopi bon pa e operacion cana bon. E ta un trabou di ekipo y ta encera hopi trabou. Lampe ta contento con tur cos a bay y ta gradici tur cu a bin y specialmente su team cu semper ta hunto y ta para pa nan studiante y e scol.
Apart di e proyecto pa punto, e tin un meta su tras tambe. Filomena College ta bezig ta recauda fondo p’asina yega na nan meta pa cumpra ‘interactive boards’, pues borchi nan digital pa pone den tur klas.
Ta trata di un suma di casi 50 mil florin cu mester pa cumpra nan y claro, scol no tin e fondo pa cual mester traha duro pa yega na nan meta.
