Den un entrevista na Universidad di Aruba cu coordinador di Fundacion Contra Violencia Relacional, Magaly Maduro, el a conta cu algun studiante di Universidad di Aruba a acerca nan fundacion pa asina realisa un bunita proyecto pa recauda fondo pa e fundacion. Asina Megan Thijsen, studiante di FHTMS, a splica cu nan a organisa un ‘drive-thru fund’ den cual nan lo bay colecta tur e articulonan cu FCVR tin mester di dje.
Tur esaki ta bay tuma luga dia 26 y 27 di maart binidero den e parkeerplaats di Universidad di Aruba for di 9:00 am pa 2:00 pm. A scoge e fundacion specifico aki debi cu e causa ta cerca di nan curason y por a nota tambe cu den pandemia e casonan di violencia relacional a subi. Na su turno, Pernilla Johanssen, un otro studiante di FHTMS riba programa di ‘exchange’, a splica cu por haci donacion di tur tipo di articulo manera co’i hunga, cuminda, paña, aparato como tambe placa via pay.aw of transferencia bancario.
Pues asina e studiantenan a invita pueblo henter pa pasa dia 26 y 27 di maart pa haci nan contribucion pa FCVR y cu tur donacion ta bonbini. Si un persona haci un donacion di mas di dies articulo, e por participa pa gana premio tambe.