Diahuebs mainta, Colegio EPI Sector Hospitalidad y Turismo (H&T) a tene un exposicion di biahe den nan auditorio.
Gloria Vega, docente n’e unidad di H&T a splica cu e exposicion tabata relaciona c’un programa nobo di LTH. Tin Hospitality Theory, Travel Destination, Spanish, Tour Operator, ICT, Tour Destination y hunto nan a bin pa forma un solo proyecto, unda cu e muchanan mester a expone nan destinacion. E alumnonan a traha riba nan booth y a decora esakinan pa nan por participa na e expo.
Tabatin un grupo di docente di e rubrica cu tabata pasa wak kico cada uno ta busca den e boothnan. Tabatin un total di diescinco booth. P’e mainta aki tambe nan tabatin algun invitado cu ta traha den e industria y nan tambe a pasa bishita e boothnan aki. den cada un di e boothnan tabatin mas o menos cinco pa seis alumno, dunando lo miho di nan pa asina presenta nan proyecto.
Algo cu sigur a resalta tabata cu den cada booth, e alumnonan a haci nan esfuerso pa asina presenta e cuminda di e pais cu nan ta representa y asina dun’e un toke mas efectivo na e exposicion aki.
E mainta aki e paisnan cu tabata presente, of miho bisa, e paisnan cu e alumnonan a representa tabata entre otro Brazil, Spaña, Hulanda, Suriname, Luxemburgo, Peru, Inglatera, Belgica. Es decir tin un gran cantidad di pais cu tabata presente y docente Vega a bisa di ta sumamente orguyoso di e exposicion cu su alumnonan a trece padilanti.
A puntra Vega si ta haci e exposicion aki tur aña, riba cual el a afirma cu e proyecto di expo aki ta forma parti di e programa nada di Colegio EPI, unidad H& T, unda cu e alumnonan lo ta mas participativo y di e manera aki nan ta clausura e aña escolar 2023-2024.
