“Diabierna atardi tabatin un explosion cu a tuma luga na Daltra na Barcadera, sinembargo no tabata un candela manera a sosode algun aña pasa, tampoco por a haya mucho informacion di kico por a pasa”, asina un relato di prensa di Stichting Parkietenbos, presidi pa Aldrich Croes, ta indica. “Pero diasabra marduga alrededor di 5 or melding a drenta na Brandweer cu a surgi un candela patras di Ecotech na Barcadera cu a pone cu polis a pasa den cayanan di Cas Paloma, Parkietenbos y Simeon Antonio, alertando e habitantenan pa nan evacua. E habitantenan den e besindario mes no tabata na altura, hopi tabata drumi. Algun a lanta pa motibo cu e holor di huma a cuminsa penetra den e casnan. Ora cu nan a sali pafo nan a bin topa cu un mist diki diki color blauw shinishi ta tapa caminda y casnan di bisiñanan”.
“Un Auto di polis tabata zona alarma riba caminda pa alerta e habitantenan y urgi nan pa nan evacua. Varios famia cu tin baby y adulto mayor a haci caso di e yamada y a evacua nan sernan keri. E huma y holo malo a keda afecta e barionan den oranan di merdia. E barionan mas afecta tabata Cas Paloma, Mahuma un parti, Parkietenbos y Simeon Antonio. E area di Bucutiweg no a haya huma pero si e holo di kima cu a keda afecta e area te cu e biento a cambia”.
Miembronan di Stichting Parkietenbos a combersa cu varios famia afecta. Nan ta suplica Gobierno pa stop cu actividadnan di procesa sushi na Barcadera y Ser’i Teishi. “A cera dump y a habri un otro pariba di caminda na Barcadera, esey no por, esey no ta husto pa nos cu tin tanto aña ta sufri. Nos tabatin speransa cu ta cera dump y tur molester ta stop. Pero mira awor sero di sushi ta acumula patras di Ecotech y ta pega candela, kico a cambia? Asina habitantenan tabata reclama, segun e fundacion.
Tabatin famianan cu no por a evacua y mester a sigui soporta e huma y holo malo. Esnan cu mester a sali bay traha trempan na hotel y otro sitionan a core sali mas trempan pa scapa di e huma, pero lagando famia si den e situacion sofocante y peligroso. Pabao di e candela tabatin un otro sero di sushi riba un otro tereno cu aparentemente no ta di Ecotech. Si esey tambe lo a pega candela e situacion por a bira hopi mas tragico pa e habitantenan di e barionan.
Vocero di brandweer a bisa cu si nan lo a tira santo di trempan riba e candela e lo a produci mas huma y lo a tarda mas pa paga. Sinembargo asina mes e habitantenan ta conta con nan cas a keda invadi pa huma, nan wowonan a keda pica y problema cu respiracion, tur cos den cas a keda hole huma. Riba e foto por mira momento cu e candela ya a keda domina, sinembargo riba e potretnan y videonan cu a keda publica pa algun media y hasta cu Drone, por a mira con grandi e candela tabata y cuanto huma a afecta e barionan.
