Riba 14 di juni di cada aña ta celebra Dia Mundial di e Donante di Sanger, cu e meta di sensibilisa y conscientisa e poblacion mundial di e importancia di duna sanger, pa contribui cu e salud di e pashentnan cu ta rekeri transfusion.
Fabian Werleman, di Stichting Bloedbank Aruba, a bisa cu den e ultimo temponan, a ripara cu e cantidad di donantenan di sanger ta birando menos. Pero tambe ta mira un ‘veroudering’, es decir, e donantenan ta birando mas grandi. Y Stichting Bloedbank Aruba kier trece un cambio den esaki, door di reemplasa cu hendenan mas hoben, cu ta desea di haci e acto noble aki duna sanger pa yuda otro hende.
Werleman a bisa tambe cu despues di COVID, na nivel mundial, e cifranan a baha hopi. Hopi hende a stop di duna sanger y esaki tin di haber cu hopi malesa cu a bin, no directamente door di COVID. Pero si a stop di duna sanger. E aña aki, nan a bin cu e lema “Duna mas sanger, duna plasma y duna mas frecuente.” Y e frecuente aki, manera den caso di Aruba,cu tin tiki donante (1400 donante) cu ta duna hopi frecuente. Cu ta cada tres pa cuater biaha pa aña. Esey ta asina caba na Aruba. Si tin mas donante, e presion por baha hopi ya cu tres pa cuater biaha ta bira hopi pisa. Pero si no tin, e ora mester traha cu loke nan tin. Si Werleman a bisa, cu e donantenan cu nan tin, ta hendenan hopi confiabel. Asina mes, prome cu nan duna sanger, ta check nan estado di salud prome cu nan bay over na duna sanger. Pa duna sanger e persona mester ta hopi saludabel.
SANGER MAS PIDI
Por bisa cu na Aruba, tin falta di tur tipo di sanger ya cu nan falta di tur. Naturalmente, Werleman a bisa cu esun mas uza ta e O+ door cu tin mas hopi hende, tin mas uzo di dje. Pero den emergencia ta uza O- cu ta un tipo di sanger cu por duna na tur hende. Esun mas schaars den naturalesa, ta AB- cu ta un tipo di sanger poco comun, mientras cu O+ ta esun cu ta bin mas dilanti sigui pa A+.
Awendia Stichting Bloedbank Aruba ta tene varios lezing n’e scolnan secundario pa asina alenta e generacion nobo pa nan tambe bira donante.
