Ainda no ta conoci kendenan lo bay bira minister di MEP. Segun lider di MEP y formador, Evelyn Wever-Croes, no ta conoci kende y cuantonan ta bay.
No tin un coalicion ainda pero ta yegando eybanda. Ora cu yega asina leu, sa ken ta bay asumi e responsabilidad como minister, e ora lo sa cuanto luga lo tin di bay yena. E momento eynan ta bay bek na e lista y mira. Ta sinta cu e situacion cu tin ley cu ta stipula ken ta drenta. No ta algo cu Wever-Croes kier of laga di kier. Ley ta stipula cu secuencia di number e ta drenta. Si un hende bira minister, e siguiente, segun number, ta Edgar Vrolijk. Si dos hende bira, e ora ta Endy Croes. Si tres hende bira, e ora ta Shailliny Tromp-Lee y asina ta sigui segun e secuencia. Por medio di e proceso eynan, e ora lo bay atende e tema ken tin mas hopi voto y ken tin menos voto, ken ta drenta y ken no ta drenta. Pero principalmente tin cu wordo guia pa ley. Pero kendenan lo bay bira, no por bisa.
Screening a cuminsa
E formacion no ta cla, pero ta kedando cla cu e programa. A cuminsa inoficialmente papia di reparticion, pero no ta cla ainda. Ora cu nan caba cu reparticion, e ora sa exactamente kendenan ta e hendenan, dependiendo ki cartera. E ora por bisa mas miho kende ta bira. Compara cu e ultimo briefing na prensa, e unico cos cu ta diferente ta cu ta kedando cla cu e programa. Ta hopi mas avansa, ta cos cu a pensa cu ta firma prome cu fin di siman of di biaha despues di fin di siman. Asina leu si nan ta, pero no ta cla ainda. No sa cu gobernador a pidi Minister Eman pa keda algun dia mas, mirando cu e ta demisionario. Pero segun Evelyn Wever-Croes, cu den curso di otro siman, posibilidad tey cu nan lo ta cla.
