NV Elmar a manda un comunicado indicando cu un di e problemanan cu coriente a bay tabata di e Solar Park na aeropuerto. Esey ta loke NV Elmar a manda pa prensa. Nos redaccion a haya contacto cu esnan di Solar Park y nan a confirma na nos cu e problema no tabata cerca nan. E problema tabata den e sistema di Elmar mes. Nan ta entrega coriente na Elmar 100%. Ora Elmar ricibi e coriente y caminda nan ta ricibi e coriente, eynan e problema ta. NV Elmar tin un problema serio cu mantencion di nan sistema.
Solar Park ta un compania cu ta mantene su netwerk. Nan ta haci mantencion regularmente pa evita di pasa den tur loke Elmar ta pasando aden ultimo lunanan. Cada tres luna Solar Park ta haci mantencion cu expertonan di exterior. Ora cu Elmar a regla su problema den su sistema, Solar Park a sigui entrega coriente. Den e caso aki Solar Park a perde cuater ora di placa pasobra Elmar su ekipo tabata tin problema of ta deficiente pa falta di mantencion. Elmar lo sigui haya problema pasobra no ta trahando preventivo y haci mantencion. Ora problema presenta ta core yega pa drecha. Asina e ta pasando rond di Aruba practicamente tur dia.
Elmar ta causando un daño grandi na economia cu nan forma deficiente di traha. Negoshinan yen di cliente ta hiba perdida pasobra diripente coriente ta bay. Ta paralisa economia completamente cu e caida di coriente. Si no haci mantencion e problema lo sigui presenta y hopi hende ta sufriendo daño na nan aparatonan na cas y den nan negoshi. Elmar ta laba man hopi biaha pa no paga of ta pone un prijs pa bo aparato cu ta net nada. Pa aclarea, e compania di Solar Park na aeropuerto a informa y confirma cu loke NV Elmar a saca riba Solar Park no ta corecto. E problema tabata den e sistema di Elmar unda nan ta deliver e coriente pa Elmar reparti.
