Durante temporada di vakantie hopi hende ta biaha. Tin persona ta busca seguro di biahe y otro no. Pero tin hende ta kere cu pasobra nan tin Algemene Ziektekosten Verzekering (AZV) esey ta suficiente pa ora di biaha. Pero realidad ta cu AZV no ta cubri seguro di biahe y solamente ta cubri e aseguradonan na Aruba.
Solange Tchong, Relacionista publico Organo Ehecutivo AZV, a splica cu AZV ta un seguro medico valido na Aruba. Desde inicio cu a introduci e seguro medico di AZV na 2001, tur asegurado tabata informa cu na momento inscribi, AZV ta pa Aruba so.
Solamente ora ta caso cu no por ta atendi na Aruba, tin un procedura pa un asegurado bin na remarca p’un cuido medico den exterior. Esaki ta un cuido medico cu un specialista ta haci peticion cu di berdad e sistema medico di Aruba en berdad no por yuda e asegurado. El a indica cu por ehempel ley ta bisa cu no tin un diagnostico, no tin e infrastructura of no tin cierto ekipo, of conocemento, e ora tin un procedura cu por haci peticion pa haya cuido medico den exterior.
Esaki ta algo totalmente separa di loke nan ta yama e proceso of e persona ta scoge pa bay vakantie den exterior, unda cu nan ta bisa cu AZV ta valido na Aruba so. Solange a expresa cu nan ta recomenda fuertemente pa e biahero cumpra un seguro di biahe, cual ta yama seguro di biahe accidente.
