Tur aña tin grupo di studiante cu ta bay biba afo pa asina sigui cu nan estudio den exterior, sea na Merca, Hulanda of otro parti. Pero, na momento cu un studiante schrijf uit na CENSO, Algemene Ziektekosten Verzekering (AZV) ta haya e notificacion y di biaha ta stop cu e polisa di e studiante.
Solange Tchong, relacionista publico di Organo Ehecutivo AZV, ta haya cu ta hopi importante pa nan duna informacion riba e parti di seguro na momento cu un studiante bay studia afo. Tin un grupo di studiante ta saliendo y gran mayoria a acudi na Departamento di Enseñansa pa Arubalening, pero AZV ta recorda nan riba e procedura cu nan tin. Un studiante ta keda sigura cerca AZV te dia e ta subi avion y bay exterior pa studia.
AZV a manda un flyer riba nan website como Facebook page p’asina tur studiante haya e informacionnan necesario. E proceso ta cu unabes un studiante schrijf uit, esta cancela inscripcion, na CENSO, automaticamente AZV ta haya esey. Nan ta cera e polisa segun e fecha di cancelacion inscripcion na CENSO. Sinembargo, si e studiante kier sigui ta sigura te dia cu e ta biaha, e paso ta cu mester informa.
Segun Tchong, ta importante pa e studiante manda un copia di su ticket di biahe c’un copia di identificacion valido, sea ta paspoort, cedula of rijbewijs. Ta manda tur esey na [email protected] y nan ta percura e polisa t’e fecha di biahe. AZV ta percura cu e polisa aki ta cera te n’e fecha cu e studiante ta bay biaha.
