“SOGA a tuma nota di un entrevista duna awe mainta door di Directiva di Hospital y ta haci uzo di e oportunidad aki pa confirma cu en berdad tin un desacuerdo entre SOGA y e contratista principal OHLA, cu ta encarga cu e proyecto di expansion y renobacion di Dr. Horacio E. Oduber Hospital”, asina un relato emiti pa e fundacion ta cuminsa bisando.
A base di e desacuerdo riba extension di e terminacion di proyecto, e contratista a tuma e decision pa no sigui cu e proyecto di construccion. SOGA ta tumando tur e pasonan necesario pa sigura cumplimento di e condicionnan di e contracto y su derechonan.
“Na tur ocasion anterior, cu a surgi un diferencia di opinion, SOGA y OHLA semper a sa di yega na solucion, basa riba stipulacionnan den e contracto di construccion. Basa riba un interpretacion di e contracto, cu ta diferencia di e interpretacion di SOGA, OHLA a conclui cu e por bandona e trabou, mandando e sub -contratistanan local cas. Esaki a pesar di tur esfuerso di banda di SOGA, Hospital y Gobierno di Aruba, pa evita esaki”, segun SOGA, cu ta presidi pa John Hodgson.
SOGA lo trata pa yega na acuerdonan necesario pa por reanuda trabou lo mas pronto posibel, pa termina e proyecto.
Den e cuadro aki ta importante pa menciona cu a ehecuta gran mayoria di e trabou, tanto door di contratistanan local como sub-contratista di e General Contractor, cu sigur lo kier keda contribui, pa duna comunidad e hospital cu e merece. E contratistanan local aki ta completamente capacita pa termina e proyecto pa locual cu falta.
SOGA ta consciente di e importancia pa e trabou di expansion y renobacion di hospital, pa cual falta awor menos cu 10%, pa e termina mas pronto posibel. Meta y compromiso di SOGA ta pa completa e proyecto ful y na un bon manera, pa asina e unico hospital na Aruba por sigui brinda e servicio mereci, na comunidad di Aruba y na e turistanan cu ta bishita nos isla.
