Despues di ham, ayaca y pagara ta sigui e temporada di jump up. Diasabra awo 6 di januari Aruba lo disfruta di e prome parada pa aña 2024, Parada di Flambeu.
Pa cumpli cu permiso, ta necesario pa un organisacion of compania tin cu brinda SMAC e servicio medico pa e paradanan di carnaval. E edicion anterior, esta carnaval 69, Event Medical Services (EMS) a gana e bid y a subi caya cu mas di binti personal. E biaha aki, a toca Cruz Cora un biaha mas.
Carlos Peterson ta director di EMS, durante un entrevista cu 24ora.com conta cu no obstante cu el a bid cu su compania EMS, asina mes SMAC a dicidi di scoge Cruz Cora. Asina mes Petersona ta gradici SMAC p’e confiansa cu a brinda nan pa edicion anterior di carnaval.
EMS ta keda activo, no solamente pa cu actividadnan durante aña pero den carnaval tambe. Den carvanal no manera prome pero di un otro forma. Mirando e regla nobo cu Crisis Management Office (CMO) a stipula caminda e gruponan di carnaval tin cu percura pa personal medico den cada grupo, ey ta caminda cu EMS lo ta activo brindando nan servicio di semper. Ya caba e gruponan a cuminsa acerca EMS y di otro banda EMS tambe a acerca algun grupo di carnaval.
Compara cu Cruz Cora, a nota cu EMS a subsidia su trahadonan kende a yuda durante e periodo di carnaval. Tin gasto cu tin cu tene cuenta cu ne, tanto pa material pero seguro pa e trahadonan tambe. EMS no lo para keto y ta habri pa brinda servicio n’e organisacionnan cu mester di nan.
Carnaval 70 ta uno grandi, di parti EMS ta desea un y tur un feliz temporada pero tene cuenta si cu e consumo di alcohol.
