Den e bay bin entre gobierno cu SKOA, e dunado di trabao na e werksternan. Dus, esunnan cu ta haci trabao di limpiesa na scolnan di SKOA, e sindicato SEPPA hopi biaha tabata bay na gobierno pa solucion. “Semper cu e pensamento cu e derecho di e trahadonan aki no por sin mas kita for di nan,” segun Magaly Brito, secretario di SEPPA.
Den e sentencia recien riba caso di e werksternan y SKOA, hues ta papia riba un puntament’i dede entre SKOA cu SEPPA, un ta punta dede rib’e otro riba diferente aspecto. “Nos no ta di acuerdo riba e parti cu ta bisa lo tabata tin acercamento pa por negosha y yega na acuerdo, pasobra esaki absolutamente no tabata e caso,” Brito ta bisa.
Locual cu si a bin pa dilanti hopi biaha tabata ta caminda cu nan ta haya riba cierto condicion di trabao cu riba nan opinion e trahadonan aki no mester a haya. Y tambe, cu lo mester bay over pa haci cambio riba nan. SEPPA a para duro cu no por permiti esaki y no ta di acuerdo. “Mi ta kere esaki ta un muestra tambe riba pa kico cada intento di e dunado di trabao pa mishi sin mas rib’e condicionnan di trabao aki, cada biaha nos a sali p’e derechonan di e trahadonan aki.”
SEPPA ta bisa cu un di e prome casonan di aña 2022 caba y su prome resultado por a mira cu di eynan caba for di momento hues a duna trahadonan rason cu nan tin derecho riba nan reclamo, toch a bin un tiki trankilidad. Unico cos cu a keda tabata e 5% kita for di nan salario y akinan tambe hues a duna un indicacion aworaki nan cu sin mas bo por bay solamente riba un grupo. Dus un dunado di trabao no por kita placa for di un grupo.
Por compronde y mira berdad cu tin un problema financiero y un problema andando entre gobierno y SKOA, pero hues ta haya lamentabel cu hustamente e grupo di trahadonan aki cu ta percura p’un limpiesa di por lo menos 46 Scol y 600 local, mester a busca un solucion pa nan. No mester a bay crea problema y agrega mas problema financiero n’e grupo di trahadonan aki. “Pasobra nos mester corda cu e trahadonan aki a custumbra cu e entrada cu nan tin y tabata bibando di esaki caba. For di momento bo kita placa di e grupo di trahadonan akinan bo ta crea problema pa nan.”
Aworakinan cu tin un sentencia asina, ta spera cu e dunado di trabao ta cumpli y debolbe e trahadonan locual a kita for di nan. Cumpli tambe debidamente cu e salario y otro derechonan cu nan tambe mester por gosa di dje. Tanten cu esaki ta e caso por bisa cu lo tin trankilidad p’e grupo di trahadonan aki y por continua na un manera drechi, debido cu e servicio di limpiesa di scolnan cu e trahadonan aki ta brinda a pesar di experiencia mal trato na pia di trabao tur dia mes.
