E inscripcion di alumnonan nobo di kleuter cu a cuminsa dia 30 di november ultimo, ta finalisa dia 31 di januari. Esaki a bini dilanti durante un conferencia di prensa Stichting Katholiek Onderwijs Aruba (SKOA).
SKOA tin dos procedura andando paralelo, di studiantenan cu ta bay di scol preparatorio pa scol basico y tin tambe tin alumnonan cu ta inscribi pa prome biaha pa scol preparatorio.
Joseany Geerman, di e departamento di Leerling Administratie di SKOA a splica mas di e inscripcion cu lo tuma luga pa 2021-22. A cuminsa caba cu inscripcion entrante dia 30 di november y e inscripcion lo keda habri te cu dia 31 di januari 2021.
E inscripcion e aña aki lo ta completamente online. Mayornan por haci’e for di trabao, for di cas, for di unda cu nan ta. Nan ta simplemente bay riba: www.skoa.aw y ta haya tur informacion di kico mester haci y rekisitonan cu mester cumpli cu nan.
Tin cu enfatisa cu ta hopi importante pa mayornan tene cuenta cu inscripcion a cuminsa caba. Algo cu ta haci e aña aki ta cu ta First Come First Serve. Ta importante pa mayornan haci esaki na tempo, pa por haya e scol di bo escogencia.
Pa scol basico
Muchanan cu ta sali for di scol preparatorio pa scol basico, den nan caso, mayornan lo ricibi un carta via scol, entrante diabierna, 11 di december, cu un splicacion con pa haci esaki.
Mayornan mester subi e website www.onderwijs-sas.com . Aki mayornan ta busca inloggen. Despues nan ta switch bay na e parti caminda cu ta yena e username y password di e mucha. Esaki ta hay’e for di e cabesante di e scol.
Ta haci un apelacion na mayornan, comunidad di Aruba, pa haci e inscripcion tempran. A cuminsa trempan berdad y ta drenta temporadanan di fiesta caminda cu ta comparti cu famia. Pero no mester lubida di inscribi e yiu na tempo.
Innovacion den enseñansa
SKOA ta den un proceso den e ultimo añanan di innovacion. A introduci diferente area di innovacion caba den enseñansa. Por ehempel na 2017/18 a cuminsa cu SAS, cu ta un Sistema Administrativo pa Studiante. E ta full online. Ta bezig ainda ta mehora riba esaki. E idea primordial di SAS ta pa sigui e desaroyo di e alumnonan di cerca
Lisi Werleman Paris, funcionario enseñansa preparatorio di SKOA, ta splica cu nan ta kere den calidad di enseñansa y mester por sigui e desaroyo di e alumno. Esaki tanto riba parti ditactico pero tambe riba e parti social-emocional cu ta hopi importante pa e alumno su desaroyo.
Esaki lo ta e di tres aña cu lo tin un Nationaal Onderwijs Congress, cu ta tuma luga tres biaha pa aña, unda cu ta inverti den profesionalisacion di e maestronan, cual claro ta pa inverti bek den alumnonan.
Paris ta agrega cu SKOA tin total di 46 scol di cual 15 ta scol preparatorio, 25 ta scol basico, 5 MAVO y un special.
Celebracion 50 aña
Otro aña na januari ta celebra 50 aña, pero tin scolnan cu tin hopi mas cu esey caba den existencia. Sigur ta papia aki di hopi experticio y conocemento den enseñansa. SKOA tambe ta bay cu tempo. Pa e motibo ey aña pasa a cuminsa a tene un Expo SKOA. Lastimamente esaki no por a tuma luga e aña aki y tampoco no lo por tuma luga otro aña pa motibo di COVID. Lo bin cu algo otro na su luga.
