Palabra ta un simia, si e ta bon e ta trece bon cosecha y si e ta malo, e ta trece mal cosecha, bo no por papia malo y spera bon. Hopi biaha nos ta kere cu ta asina, pasobra e mentira ta mara nos na dje, pero despues ta bin sali na cla cu nos ta cosecha locual nos a sembra.
Mescos cu un mata mester wordo guia pa e crece recht, asina tambe nos yiunan mester di guia pa nan crece bon. Nan mester di e bon palabra, e coreccion na tempo, e disciplina cu tur ora mester t’ey pa asina e caracter wordo forma, y asina nos lo yega na e Integridad cu tur persona mester tin.
Pero si nos ta papia negativo den cas hasta di otro persona esey ta trece mal influencia, den nos hogar, pasobra bo cas ta un luga di paz, caminda bo mester laga ordo y positivismo reina y mas cu tur cos laga e Palabra di Dios domina na tur momento.
Hopi biaha como mayor nos no ta tene cuenta cu locual nos ta papia den nos cas y nos ta trece tur sorto di influencia robes y nos no ta corda cu esey ta keda sembra den e mucha nan. Nos ta bini cas rabia, nos ta discuti, nos ta persisti den papia malo y desea malo pa un persona, y nos no ta tene na cuenta cu mucha ta mira y mucha ta sinti. Despues mucha lo haci mesun cos, pasobra ta nos mes a trece den cas y e mucha lo imita locual e ta mira.
Ta imposibel pa nos trece crecemento den cas, spiritual, material, financiero cu un pensamento caminda nos mes ta limita nos mes cu palabra negativo.
Pa bo logra exito den bo bida, laga Dios guia bo, pa asina abo por guia bo famia, no cana bao di influencia di otro hende pasobra bo tin chens di kere cu bo ta un AMIGO y bo a bira un instrumento. No permiti ningun hende sembra rabia. y odio den bo.
Tur hende lo cosecha locual nan ta sembra esey ta biblico, y tur hende mester duna cuenta na Dios.
Pero un cos nos ta sigur cu locual hende ta bisa di bo bida, no ta locual Dios ta bisa di bo, p’esey bo relacion cu Dios mester ta bon, pa asina bo por enfrenta negativismo di hende.
Y con bo por hacie esey, solamente pa medio di oracion, y bo ta papia locual abo kier mira sosode den bo bida, tur locual ta recto, puro, decente, y mas cu tur cos den boluntad di Dios.
Bo ta agradecido na Dios pa tur locual E a haci pa bo y tur locual cu E ta bay haci, kere den Dios y demostra esey cu fe , den Dios y ora Dios mira bo confiansa e porta di bendicion ta habri pa bo.
Nos ta biba den tempo dificil, y nos mester tene cuenta con nos ta papia y kico nos ta papia riba nos bida nos cas y nos famia. Pasobra ta hopi facil daña nos relacion cu Dios y cay den idolatria sin nos ripara.
Riba tur cos cu bo ta haci papia bendicion riba bo Famia, y bo por ta sigur cu maldad lo aleha y bondad lo prevalece.
