Directiva di Sindicato di Trahadonan di Aruba (S.T.A) hunto cu su delegadonan a firma e prome Contracto Colectivo (CAO) cu e compania “Costa Linda Beach Resort” riba 26 di januari 2024.
Despues di varios aña di lucha a bin logra firma e contracto colectivo cu ta encera un adelanto y tur cos hunto di riba 15% reparti riba 3 aña.
E empleadonan lo conoce adelanto den salario tur aña cuminsando 1 di januari 2024 cu forsa retroactivo. Tambe lo conoce adelanto den nan placa di spaar, bonus di fin di aña, dianan di vacacion, placa di cuminda djis pa menciona un par.
Directiva di STA kier a felicita e empleadonan di Costa Linda cu nan prome CAO y tambe gradici e delegadonan di STA emplea na Costa Linda esta Giovanni, Daniel y Victor y den mesun rosea gradici gerencia di e compania y nan abogado sin lubida Mediador di Gobierno di Aruba cu tambe a pone su granito p’asina partidonan por yega na otro y asina firma e CAO pa cu e compania.
No tawata un negociacion facil, segun e sindicato, pero atrobe perseverancia a vence. Nan di S.T.A. ta manda pabian un biaha mas na e empleadonan di e compania cu nan prome contracto colectivo.
Tocante STA
A funda Sindicato di Trahadonan di Aruba (STA) na aña 1964. E tempo ey como “Gouvernements Arbeiders Bond Aruba” pues GABA y cu tempo a cambia pa STA. E presidente actual ta Diego de Cuba, cu a tuma timon di e sindicato over na aña 2009 ora nan tabatin solamente dos compania afilia. Despues di 14 aña, awe e sindicato ta conta cu hopi compania afilia y cu un lista largo di miembro, haciendo nan un di e sindicatonan di mas grandi di Aruba. Nan ta representa un cantidad di miembro den sector priva, den gobierno y hasta den companianan priva di gobierno.
Tocante Costa Linda
Costa Linda Beach Resort a habri su portanan na november 1991. E hotel tin no menos di 160 camber y ta conta cu 130 empleado den servicio director. E tin un di e beachnan di mas largo y hancho su dilanti.
