Diabierna ultimo tabatin un reunion na POVA, caminda cu Altocomisario Ramon Arnhem tabat’ey presente, papiando masha habri cu e miembronan y splica nan kico ta pasando den e Cuerpo. Sindicato SPA tambe tabat’ey. Y e reunion aki a bay bon.
Sinembargo, despues di e reunion aki, vice-presidente di e sindicato SPA, Rolando Maduro, a dicidi cu e ta tuma su retiro. Aparentemente no tin problema cu e presidente riba su mes. Pero si tin un problema interno.
E statutonan di SPA ta bisa cu mester tin 7 of 9 miembro, cual na comienso nan tabata 7, dos miembro a tuma nan retiro, a bira cinco y awo cu e salida di e vice-presidente, nan a bira cuater y esaki a bira un problema. Tecnicamente e directiva a cay, den e sentido cu mester yama eleccion mesora pa por ‘vul bij’ e tres luganan cu ta liber.
Den un entrevista riba ENFOKE dialuna merdia, Rodney Solognier, den su calidad di presidente di SPA, a indica e sindicato a manda un relato cu ta splica cu SPA no sa precisamente kico Rolando Maduro kier logra cu su retiro y ta haya lamentabel cu a scoge pa tuma su retiro e manera ey.
E sindicato ta desaproba e manera no profesional cu a scoge pa bay media y tacha e imagen di SPA y cu no a opta pa soluciona cos den SPA mes cu e coleganan. Tabatin diferencia di opinion den SPA y na momento cu a confront’e riba acto cu e mes tabata contra, a corta comunicacion cu directiva mesora y a tuma su retiro.
Na un manera infunda ta purba di daña e reputacion di SPA cu no solamente por afecta e directiva actual, pero tambe e proximo directivanan den futuro. Tin di enfatisa cu esaki ta bay en contra di e reglanan di e statutonan.
Esaki no tabata na su luga. Tampoco no ta cuadra cu e normanan cu ta aceptabel den sindicato. SPA ta pensa cu mester reflexiona bon, pasobra esaki por laga marca profundo atras. SPA ta compromete pa representa e interes di cada un di su miembronan y esaki ta un distraccion innecesario.
Pa mas detaye lesa TREMPAN.
