Sindicato SIMAR lo ta subiendo caya diaranson unda cu nan lo tin un marcha pasivo pa entrega un carta contra Minister di Enseñansa Rudy Lampe pa su mal maneho. Pa esaki e sindicatonan SEPPA y S.P.A. lo ta formando parti na e marcha aki pa duna nan sosten, mustra nan solidaridad cu nan. E miembronan di SEPPA ta preocupa cu tur cos cu ta pasando, cual motibo nan kier subi caya y mustra esaki.
E docentenan a pidi pa ta presente na un reunion unda cu nan ta trece padilanti nan mal contento rond e situacion di e Minister di Enseñansa. Diferente topico a pone cu nan no ta contento manera pone diferente scol bou un solo organisacion, haci cambionan, reapertura di scolnan con esaki a bay. Tin mal contento cu no a percura p’e medidanan di precaucion, e medidanan di bienestar di henter staff, tin e werksternan, esnan cu ta sostene trabounan diario na scol. Hopi cos tin e empleadonan mal contento y esey a pone cu e miembronan di SEPPA kier a reuni y tende tur cos.
SEPPA tin un grupo grandi di docente afilia, lo uni cu SIMAR na e marcha despues di a tende tur punto treci padilanti. Na mes momento e otro preocupacionnan treci padilanti di e otro gruponan, segun Magaly Britto, secretario di SEPPA, nan lo hiba esakinan diaranson hunto cu sindicato SIMAR.
Nan ta representando e grupo di werkster cu ta traha na SKOA tin chens di perde nan trabou. Esaki ta pasando na un momento cu e scol mester di nan pa mantene e scolnan, klasnan limpi. Awo nan ta confrontando un situacion cu nan dunado di trabou, esta SKOA, unda a informa nan cu kisas lo mester retira nan pa falta di fondo. E problema di fondo ta origina desde hopi aña atras. Den añanan 90 sindicato SEPPA a yega na un acuerdo huridico cu Gobierno, di cual na 1991 esaki a keda cla p’e grupo di obrero.
E werksternan a keda atras y despues di un lucha largo a keda cla na 2014. Aki a regla a base negociacion a yega na un base di salario.Nan ta haya unda cu tur fundacion tin un werkster trahando, cu gobierno mester subsidia nan salario. Werksternan ta complimenta e trabou di e fundacionnan aki defacto ta cay bou responsabilidad di gobierno. Enseñansa ta responsabilidad di pais Aruba y esey ta nifica cu nan salario tambe mester wordo subsidia mescos cu otro werksternan cu ta traha na scolnan publico.
