Durante e reunion di dialuna durante dia, Geert Wilders, lider di PVV, e maximo ganadonan di e ultimo eleccion di Tweede Kamer, a indica cu a yega na un acuerdo y finalmente laat anochi, a confirma cu tabatin un formacion definitivo, aunke nomber di e ministernan ainda no ta publico.
Distribucion di ministerio den e gabinete nobo
PVV, e artido mas grandi den e eleccionnan di Tweede Kamer cu a tuma luga recientemente, lo haya cinco ministerio den e gabinete nobo, mientras cu NSC y VVD lo tin cuater minister cada un, mientras cu BBB lo conta cu dos ministerio. Segun fuente confirma pa NRC diamars, cu un total di diescinco minister, lo ta mas chikito compara cu e gabinete saliente di Rutte IV, cu tabatin binti minister.
Lo bay tin entre 12 y 13 secretario di estado. Esey ta loke e fuentenan di Den Haag a bisa NOS. PVV lo proporciona entre otro un minister di Migracion, VVD lo tin finansa y BBB agricultura. NSC lo ta encarga cu asuntonan interior (Binnenlandse Zaken).
PVV
PVV lo tin cinco minister: fuera di migracion, tambe nan lo tin salud, comercio exterior y cooperacion pa desaroyo, asunto economico y infrastructura. PVV lo proporciona e secretarionan di estado pa salud, husticia, asuntonan iinterior y infrastructura..
VVD
VVD por conta cu cuater cargo ministerial. Fuera di finansa, VVD tambe lo tin husticia, defensa y e ministerio di clima y crecemento berde, un nomber nobo. E secretarionan di estado di VVD lo bay ta den educacion, asunto social y salud publico, bienestar y deporte.
NSC
NSC tambe lo tin cuater funcion ministerial. Fuera di asuntonan interior (BZK), NSC lo proporciona e ministernan pa asuntonan exterior, asuntonan social y educacion. NSC lo tin dos secretario di estado den finansa y uno den husticia.
BBB
E dos ministernan di BBB lo bay pa agricultura y vivienda. E secretarionan di estado di BBB lo ta den agricultura y defensa y den un ministerio ainda desconoci. Asina BBB lo tin tanto e minister como e secretario di estado di agricultura.
Cuater vice-prome minister
Pa PVV ainda no ta cla kende lo ta e vice prome-minister pero ta menciona e nomber di “Gidi Madkuszower. Tambe e por ta e minister di migracion. Sophie Hermans (VVD) lo ta e minister di Clima y tambe vice-prome minister. A informa cu e parlamentario di NSC Eddy van Hijum lo ta minister di Asuntonan Social y vice prome-minister. Tambe ta considerando como vice-prome minister Mona Keijzer (BBB) kende lo ta e Minister di Vivienda.
Otro nomber notabel cu a menciona ta Fleur Agema (PVV) como Minister di Salud, Eelco Heinen (VVD) como Minister di Finansa y Ruben Brekelmans (VVD) como Minister di Defensa. David van Weel (VVD), ex- consehero di prome minister Rutte, ta menciona como Minister di Husticia. Folkert Idsinga (NSC) probablemente lo ta Secretario di Finansa y Caspar Veldkamp (NSC) lo ta considera como minister di Asuntonan Exterior.
E intencion ta cu mita di e nuebe ministernan y e secretarionan di estado ta “externo”. E otro mita lo ta consisti pa persona den politica.
Encuanto tur e candidatonan ta conoci, nan lo ta gescreen (of ya a screen) y lo tin un entrevista cu e candidato pa Prome Minister Schoof y e formado Van Zwol. Cu e candidatonan lo efectua audiencia den Tweede Kamer, caminda tur e fraccionnan por haci pregunta. Na final di juni lo sigui e huramentacion pa Rey Willem-Alexander, fuera di e potret oficial dilanti e palacio.
Programa di gobierno den zomer
Durante zomer, e ekipo di minister lo traha riba “un programa di gobierno.” Esaki ta e desaroyo detaya di e acuerdo di coalicion di PVV, VVD, NSC y BBB.
Rumor ta keda rumor
Durante e reciente reunion di IPKO (Interparlementair Koninkrijksoverleg), cu a conclui dialuna, a surgi un rumor den e gangnan di Eerste Kamer riba e posibel asignacion di Andre Bosman y Roelien Kamminga sea como Minister of Secretario di Estado encarga cu e Relacionnan di Reino. Ambos ta figura basta controversial riba e islanan di Aruba, Corsou y Sint Maarten.
E dos figuranan aki tabata controversial den e historia politico Hulandes y e islanan di Caribe Hulandes, ya cu nan dos ta conoci pa tin pensamento basta radical pa loke ta trata di e ciudadanonan di e banda aki di reino, migra pa Hulanda y tin un bida eynan.
Tambe ambos tabatin basta critica pa loke ta gobernacion y finansa di e paisnan, cu reaccion di publico basta pisa den nan direccion.
Un otro nomber cu ta circulando cu por haya un posicion como Secretario di Estado ta Alexander van Hattem, kende tambe ta un figura basta controversial den politica Hulandes.
