Lucha di e maestronan como tambe algun otro trahado publico no ta algo desconoci den nos comunidad. Pues, ya ta mas cu un aña caba cu constantemente tin accion pa protesta e recorte cu gobierno a impone riba nan salario di 12.6%. E ultimo acontecimentonan relaciona cu esaki ta cu, mirando cu gobierno no a elimina e recorte, e trahadonan a dicidi cu nan lo bay traha algun ora menos pa esaki bira ekivalente na e perdida parcial di nan salario.
Den un reaccion riba esaki, gobierno a entama un caso contra SIMAR, un asina yama ‘spoedprocedure’ of ‘kort geding’. Den esaki, hues ta tuma un decision relaciona cu un caso den forma abrupto y preliminar, pues sin cu esaki ta un sentencia definitivo. Awe mainta 9:00 am den Corte di Prome Instancia, hues a inicia puntrando si sindicato SIMAR y SEPPA ta uni cu otro den nan ponencianan, riba cual a contesta cu si.
Despues di a scucha e argumentonan di ambos partido, pues Land Aruba como tambe e abogadonan representando e clientenan SIMAR y SEPPA, hues a cuestiona e hecho cu gobierno a uza como argumento cu ta Hulanda a pidi e recorte di 12.6%, siendo cu Hulanda a apenas bisa pa corta, pero na ningun momento a indica cu ta asina e recorte mester a tuma luga. A señala e ora na cu ta gobierno di Aruba a bin cu e condicionnan y Hulanda a bay di acuerdo cu esaki y no cu ta Hulanda a bisa pa corta 12.6%. A puntra dibiaha tambe si mester a bin cu un solucion structural of uno temporal y a puntra e ora kico gobierno di Aruba a propone como e solucion structural.
Asina e hues a puntra defensa si no tin otro solucion, cu no ta menos ora di les. Presidente di SIMAR a intercambia algun palabra cu hues riba esaki. Locual mester subraya ta cu na su turno, director di financiën Derrick Werleman, a admiti cu dos aña ta largo pa e recorte aki y hues a bolbe puntra kico ta bira e solucion structural, pues den termino largo pa e situacion aki.
Riba cual, no tabatin contesta. Na su turno mr. Kock a bisa cu e ta contento cu porfin Land Aruba a admiti cu no tabata propuesta di Hulanda pa haci e recorte di 12.6% ya cu ningun caminda ta para cu por a voer esaki in pa un periodo indetermina. A subraya dibiaha cu, Land Aruba no a trece ningun solucion structural pa dilanti y cu no a implementa un maneho hustifica, sino a simplemente a implementa algo “temporal” y a sinta warda wak con largo esaki por wanta. A añadi cu awo ta presenta cu un situacion cu simplemente no ta duna mas.
Hues na su turno a duna dos opcion, sea e mes ta tuma un decision dia 2 di maart 2022 of ta duna Land Aruba un periodo di tres luna pa bin cu un solucion structural. A pidi si, pa no bin cu man bashi ni tampoco bin cu un otro solucion temporal. Tambe hues a remarca cu si e haya esaki necesario, e lo manda gobierno di Aruba Hulanda pa asina bin un propuesta structural for di Hulanda y no un “pleister riba e herida”, manera abogado mr. Kock a subraya.
Pa un relato mas amplio lesa edicion di TREMPAN mañan.
