Den Salmo 66:16-20 tin un splicacion cu mester hala atencion di tur hende bisando: Bin y tende , boso tur cu ta teme Dios, y lo mi conta boso loke E a haci pa mi alma.
Mi a sclama na dj’E cu mi boca, y E a wordo glorifica cu mi lenga. Si mi a warda maldad den mi curason, Señor lo no a tende mi, ma di berdad Dios a tende.
El a paga atencion na e bos di mi oracion.
Bendiciona sea Dios, kende no a rechasa mi oracion, ni a kita su misericordia for di mi.
Aki nos por lesa un parti di historia di rey David, kende a drumi cu Betsabe, y e ta tabata bon na altura cu Betsabe tabata casa, pero tambe e a manda mata e casa di Betsabe yama Urias, pa asina sconde su pica pa e asunto keda tapa, pero pa Dios nada no ta keda scondi ni maske con rico un persona ta, ni tampoco su posicion politico,mandatario, y ni maske e ta un rey, pasobra Dios ta odia pica y malicia.
Dios a manda profeta Nathan cerca dje pa kita su mascarada, saca e maldad na cla, y asina David a arepenti, pidi pordon na Dios, y biba, y tabata un baron conforme na Dios su curason (Hechonan 13;22-23).
Tin e cosnan cu nos por haci, cu ta pone cu Dios no ta scucha nos oracion.
*Ora nos ta ignora e pober (Proverbionan 21:13), esun cu ta cera su horea pa sclamacion di e pober, e tambe lo sclama ma lo no wordo contesta.
*Ora nos ta duda cu Dios ta duna sabiduria (Santiago 1:5-7). Ma si cualkier di boso falta sabiduria, lag’e pidi Dios, Kende ta duna na tur hende generosamente, y sin reproche, esaki lo ta duna na dje.
Ma lag’e pidi den fe, sin ningun duda,pasobra esun cu duda, ta manera ola di lama, cu ta lastra y tira door di biento. Pasobra no laga e hende ey spera cu e lo ricibi algo si Señor, siendo un hende di curason dobel, inconstante den tur su camindanan.
*Ora nos ta Orguyoso (Santiago 4;6). Ma e ta duna un gracia, mas grandi ainda. P’esey scritura ta bisa;Dios ta resisti e orguyosonan, ma ta duna gracia na e humildenan.
*Ora un hende ta orguyoso y no kier arepenti,y kier sigi biba den su maldad, su comunicacion cu Dios ta kibra.
*Ora nos ta violento (Isaias 1:15). P’esey ora boso habri boso mannan den oracion, Lo mi sconde Mi wowonan pa boso, si maske boso haci hopi oracion, Lo mi no scucha. Boso mannan ta yen di sanger.
*Ora bo ta trata bo esposa malo (1 Pedro 3:7). Mescos boso, e esposonan biba cu boso esposanan cu comprendemento,manera cu un vaas mas delicado,como cu e ta hende muhe, y dun’e honor como coheredero di e gracia di bida, pa boso oracionnan no wordo stroba.
*Ora nos ta egoista (Santiago 4:3). Boso ta pidi y no ta ricibi, pasobra boso ta pidi cu motibo robes, pa boso gast’e den boso placernan. Hopi biaha por sosode cu nos ta pidi pa un necesidad, pero den nos cabes nos tin otro plan, e ora ey Dios no ta tende nos oracion.
*Ora nos ta trata hende malo, ora nos ta apoya maldad y inmoralidad (Mikeas 3:4). Boso ta odia bondad y stima maldad (No lubida riba Isaias 5:20).
P’esey semper prome cu nos haci oracion, laga nos pone nos curason recto cu Dios pa nos oracion wordo scucha.
