Desde 3 aña pasa mi a percura pa pone e situacion di retonan di nos studiantenan na Hulanda riba agenda di Tripartiet entre Aruba, Curaçao y Sint Maarten y tambe riba esun di IPKO caminda Hulanda tambe ta sinta na mesa.
Durante mi biahe recientemente pa Hulanda, un biaha mas mi a duna atencion personal na e retonan di nos studiantenan na Hulanda. Dia 4 di juni 2024 mi a realisa un bishita di trabou na Haagse Hogeschool. Un scol caminda hopi di nos studiantenan ta studia. Aki mi a reuni cu e Adviseur Instroom di e scol, Marianne van Veldhuisen y tambe cu e mentor di Den Haag, Shahaira Brokke. Pa ta concreto mi kier a reuni cu e scol pa trata e siguiente puntonan pa haya sa di nan banda nan pensamento:
⁃ Con e experiencia di e scol ta cu nos studiantenan;
⁃ Segun e scol kico ta e retonan di nos studiantenan;
⁃ Kico nan ta pensa nos por of mester haci pa prepara nos studiantenan cu ta bin Hulanda miho;
⁃ Ki servicio e scol tin pa nos studiantenan.
Pa loke ta trata e dos prome puntonan mi por bisa cu loke e scol ta indica ta coincidi cu loke hopi biaha nos ta haya den e rapportnan y sigur den esun di e Ombudsman di Hulanda di 2020. Nos muchanan ta shimaron (verlegen), no gusta papia y haci pregunta, esaki hopi biaha door di berguensa. Segun Veldhuisen, nos hobennan mester accentua di unda nan ta bin, y realisa cu Hulandes no ta nan lenga materno y mester ta orguyoso di toch por defende nan mes den Hulandes of Ingles. Nos por bisa tambe cu tin un diferencia entre e hobennan cu ta sigui un estudio internacional cu ta na Ingles y esnan cu nan estudio ta na Hulandes.
![](https://24ora.com/wp-content/uploads/2024/06/STL-160624.jpeg)
Como reto sigur ta keda subraya e puntonan manera e tempo (weer), idioma, heimwee y diferencia den cultura. E shock den cultura tin hopi impacto y hopi biaha ta influencia nos studiantenan negativamente. Tambe nos a toca e aspecto di vivienda, belasting y seguro. E retonan generalmente conoci bou di e studiantenan di nos islanan cu tambe tin un impacto grandi riba e bida di nos studiantenan. P’esey nos mester sigui stress riba un preparacion mas amplio y dirigi pa nos hobennan ta miho posibel prepara pa biba y studia na Hulanda. Un punto cu mi a bin ta trata cu nos Minister di Enseñansa.
Algo cu ta keda remarcabel ta e echo cu nos studiantenan hopi biaha ta cambia di estudio durante of despues di e prome aña. Esaki por tin implicacion y consecuencia pa nan finansas di DUO y cu nan vivienda. P’esey nos mester keda traha na un miho guia y sosten pa nos studiantenan pa loke ta trata escogencia di estudio.
Un otro aspecto cu Marianne van Veldhuisen a indica ta cu e ta haya e parti di bishita di nos scolnan secundario na Hulanda y na nan scol algo hopi positivo. Nan por experencia e bida na Hulanda, e infrastructura y transporte publico, siña conoce diferente stad y con ta move diariamente. Esaki sigur ta algo hopi positivo.
![](https://24ora.com/wp-content/uploads/2024/06/STL2-160624.jpeg)
Haagse Hogeschool tin diferente servicio cu nan ta brinda nos studiantenan cu ta sigui nan estudio na nan scol. Esakinan ta e.o. yudansa psicologico via scol, e programa Care: concentra riba comunidad y buddysysteem, por pidi extra tempo pa traha tentamen, ta duna guia y sosten cu studiekeuze mediante un trayecto dirigi, nan por yuda prome y durante di estudio si ta desea cambio, inspiratiepad y conseho, sosten y yudansa via decaan. Mirando cu hopi biaha nos studiantenan no sa di e servicionan aki, mi persona lo bay acerca Minister Endy Croes y Minister Plenipotenciario Ady Thijsen pa nan laga haci un inventarisacion di kico tur e scolnan mas bishita door di nos studiantenan tin pa ofrece y haci esakinan conoci pa nos studiantenan.
Como parlamentario mi ta haya importante pa sigui urgi y pusha pa bin cu solucion concreto y structural pa haci e startpositie di nos studiantenan miho y elimina mas cu por e retonan cu ta forma un limitacion of tin consecuencia hopi negativo pa nan. Un logro recien ta cu nos studiantenan por haya na BSN-nummer aki na Aruba mes prome cu nan bay Hulanda. Door di esaki nan tin menos “problema” ora nan yega Hulanda y menos stress. Un logro cu riba diferente nivel a traha riba dje y hunto a logra.
Pa finalisa mi ta haya cu nos tur, Gobierno, Parlamento y famia, tin e tarea pa nos haci lo maximo pa nos studiantenan por sigui y termina nan estudio exitosamente. Y mesun importante ta pa nan bin cas bek y aporta na desaroyo di nos pais.
![](https://24ora.com/wp-content/uploads/2024/06/STL3-160624-1920x1440.jpeg)