E presion ta wordo poni hopi riba loke ta e dialyse pashentnan y sa cu tabata tin un posada un tempo na Playa. Despues el a keda amplia y awo tin mas di un luga pa duna servicio di dialyse.
Dr. Joel Rajnherc, director di Imsan, a splica cu e cantidad di pashent cu mester di dialyse, e pashentnan cu nan riñonnan no ta haci suficiente mas e funcion pa haci e sanger limpi, ta aumentando y ta sigui aumenta. E proceso eynan no ta algo cu te ainda por a tene un frena riba dje y ta eigenlijk birando asina estresante. Tin mas pashent, mas hende cu necesidad pa dialyse cu ta prepara pa bay duna e ayudo. Imsan a cuminsa cu un ampliacion na 2013, na September, unda cu nan a habri oficialmente y a cuminsa cu un dialyse kring cu tabata suficiente pa 18 stacion. E momento ey tabata uzando aproximadamente 11 y de bes en cuando 12 di e stacionnan ey. Un tercera parti a lo menos tabata echt bashi. Na e momento aki hospital no tin posibilidad pa amplia echt e cantidad di dialyse station y Imsan tambe a yega cu nan ta poniendo e borchi pafo full. Tur 18 stacion ta wordo uza diariamente. Tin dos shift cu ta tuma luga y esey ta nifica cu ta tratando akinan aproximadamente 65 pa 67 pashent cada dos dia. Hospital tambe su departamento di dialyse ta yen y mester wordo escogi awo con por amplia e posibilidad pa haci dialyse na Aruba. Tin mas pashent cu ta biniendo y sa cu door cu e tratamento ta bayendo asina bon, e duracion di tratamento ta hopi largo pa e pashentnan. No ta wak cu e cantidad di pashent cu nan ta tratando ta bay disminui. Al contrario, e ta bira mas y mas. Tin dos opcion. Of tin cu busca luga hunto cu HOH pa amplia e cantidad di stacion cu por sigui cu dos warda of kisas ta bay ta necesario pa busca un tercer warda. Kisas prome na Hospital mes y despues na Imsan.
Pero esey ta cosnan cu ta investigando awo, cual ta e miho opcion. Cua ta esun mas realistico, cua ta esun mas eficiente, y cua ta esun mas aceptabel pa duna e bon servicio na e pashent tambe.
Costo di dialyse
Dr. Rajnherc a splica cu anualmente cada pashent ta costa aproximadamente 100 mil florin den tratamento, cu tur e remedinan cu e tin, cu tur otro malesanan cu e pashentnan aki tin pa cubri e pashent cu ta na dialyse. E suma eynan ta basta realistico.
Peticion di otro areanan
Imsan ta haya peticion di otro luganan. Ya for di temporada di La Posada na Playa, tabata tin basta turista Mericano y algun di Europa tambe cu tin timeshare na Aruba y cu sa bin Aruba pa keda aki pa simannan largo y obviamente mester di nan tratamento di dialyse. Tabata sirbi e pashentnan eynan semper. Ora cu a tuma e actividadnan di La Posada over, a sigui cu e mesun pashentnan tambe. Pero mas y mas tabata wak cu no por amplia e servicio ey cu ora pashentnan nobo for di exterior kier bin pa haya e servicio eynan, ta yen caba y mester primariamente fix nos propio poblacion. Pero esey kiermen cu hopi pashent cu kier bin bishita Aruba ta haya problema cu nan no ta haya e servicionan necesario cu nan no tin y kier brinda esey, pasobra esey ta parti di mustra con bon e salubridad publico ta, si por ofrece e servicionan ey na e hendenan di afo. No mester lubida cu e hendenan aki tambe ta haci inversionnan na Aruba. Nan tin nan real estate cu nan a cumpra aki. Nan ta biba na Aruba pa varios luna cada aña y nan ta hende cu nan ta acepta cu mannan habri. Eseynan tambe tin cu wak bon con por bay haci e ampliacion di e servicio di dialyse.
