Diahuebs anochi e seleccion masculino di futbol di Aruba a sigui cu nan di tres sesion training di preparacion p’e wega di Clasificacion di Concacaf pa FIFA Copa Mundial 2026. Diasabra anochi, pa 8:00 pm, e seleccion di Aruba ta enfrenta esun di Corsou, cu ya caba tin tres punto despues di nan victoria di 4-1 riba Barbados.
Bondscoach Marvic Bermudez hunto cu su staff tecnico a prepara e hungadonan pa e encuentro aki, cual ta uno spera. A percura pa drecha unda cu falta p’asina por subi veld diasabra anochi. E hungadonan como coach y staff ta enfoca pa haya e puntonan necesario p’asina avansa.
No ta prome bes cu e seleccionnan aki ta topa otro. Entre aña 2012 cu 2015 e seleccionnan aki a enfrenta otro cinco biaha. Aruba a gana Corsou un biaha, perde dos biaha y un biaha a empata.
Tocante AVB
A funda Arubaanse Voetbal Bond (AVB) na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur nos isla, incluyendo e muchanan, hoben, hende muhe y adultonan. Nan ta responsabel pa sanciona e torneonan di futbol organisa pa mayoria liga. E oficina di AVB ta situa den Compleho Deportivo Frans Figaroa na Noord. Ing. Richard Dijkhoff ta Presidente, eligi pa mayoria club miembro di AVB.
