The Chaz Modeling & Talent School a instala diasabra anochi 6 representante na Wayaca Lounge cu lo representa Aruba den Agnes Universe y Draft Models International na Punta Cana y Orlando Fashion Week OFK na Orlando.
Pa Agnes Universe y Draft Models International na Punta Cana, Republica Dominicana 4 modelo di Aruba lo participa. Pa Draft Models International lo participa Caithlyne Kock, Eve Hoftijzer, Cristalyne Kock y Carolyne Kock. Y pa Agnes Universe a corona dos modelo, kendenan ta Eve Hoftijzer como Little Beautiful Aruba 2024 y Caithlyne Kock como Pre Teen Model Aruba 2024.
Agnes Universe ta un certamen di beyesa combina cu modelahe. Aki e muchanan lo siña y practica tur locual ta encera modelahe y beyesa, y tambe intercambio di cultura. Draft Models International ta un congreso di modelo caminda diferente diseñador, scouts, e agencianan di moda lo haci diferente casting pa scoge nan modelonan pa nan shownan, comercialnan y cu oportunidad di ta scogi pa participa na Fashion Week Paris 2025.
Pa Orlando Fashion Kids OFK 2024 na Orlando, Merca, den luna di juli 2024, The Chaz Modeling & Talent School lo tin dos modelo representando Aruba. Esakinan ta Samara Salazar, kende ta e Baby Model OFK 2024, y Rixienne Tromp, kende ta e Mini Model OFK 2024. Orlando Fashion Kids ta un congreso y fashion show pa mucha cu lo duna diferente tayer y tambe nan lo competi den miho pasarela como miho sesion di photoshooting.
Keda pendiente den luna di juli pa un cobertura di tur Aruba su representantenan. Y no lubida di apoya nan online door di like y share tur nan postnan.
