Aruba ta pasando den un tempo di crisis y nos tin un gobierno cu no tin un vision con pa saca Aruba for di e problemanan cu tin riba tur tereno. E motibo pakico no por kita e peso di e medida di 12.6% for di lomba di e empleadonan publico ta paso na prome luga gobierno no tin un presupuesto balansa y na di dos luga pasobra Hulanda ta keda para riba cu gobierno mester cumpli cu e proposicion cu e mes a haci cu Hulanda pa introduci e 12.6%, ta loke lider di partido CURPA, Eric Ras, a indica den un comunicado di prensa.
Ta conoci cu den e ultimo añanan nunca a entrega e presupuesto na tempo. Ley ta bisa cu den luna di september mester entrega e presupuesto di e siguiente aña pero den realidad no ta cumpli cu ne. Nos ta corda e presupuesto di aña 2021 a trata den luna di januari 2021 pero no a haya aprobacion di CAFT y nan mester trece cambio den dje.
Dia 30 di maart 2021 gobierno a cay y te cu den luna di mei 2021 a core trata e presupuesto cual ta hopi laat. Esaki ta demostra cu no tin seriedad pa locual cu ta trata e maneho riba nos finansa publico y cu de facto ta Hulanda ta manda pasobra ta presenta e presupuesto na parlamento di Aruba te despues cu esaki a haya aprobacion di Hulanda.
Hulanda a pidi pa e presupuesto di 2022 ta trata den december 2021 y ya nos ta den luna di februari 2022 y te ainda no a trata e presupuesto. Esaki t’e motibo cu Hulanda no ta mira e seriedad den e gobernacion di Aruba. Tur cos ta mustra cu e presupuesto 2022 lo no ta aproba pa CAFT tampoco.
Un otro aspecto cu gobierno kier trata na sconde ta e motibo pa locual e 12.6% a wordo introduci. Prome minister ta keda declara cu a introduci e 12.6% riba exigencia Hulandes, pero en realidad historia a mustra cu ta Aruba a bin cu e proposicion na prome luga. Ta logico cu Hulanda a grap esaki cu dos man, pasobra for di hopi tempo a bin ta exigi pa baha gasto di empleado publico. Tur expectativa tabata ta cu lo reduci e cantidad di empleado publico, pero nunca por a spera cu e intencion di gobierno tabata ta pa baha man cu e beneficionan secundario y na mesun momento reduci salario. Un muestra di esaki ta e hecho cu e bevorderingslandsbesluiten actual ta inclui caba e inkortingsbezoldiging sin cu ta menciona cu esaki lo por ta temporario. Pues mas claro no canta un gallo. E reduccion a bin pa keda.
Comokiera cu Hulanda tin poco confianza den palabracion haci cu Aruba, ya caba tur cos ta cla pa 70 Hulandes Europeo bin Aruba pa traha y asina cuminsa pone ordo den cas pa por tin un cambio den maneho riba nos isla. E binimento di e 70 Hulandesnan Europeo ta demostra claramente cu Aruba a perde su Status Aparte y cu nos ta incompetente pasobra no tin seriedad den nos maneho aki na Aruba. Nos mester mira e asunto aki hopi serio y nos mester tin berguensa con Aruba ta goberna den e ultimo añanan aki.
Gobierno a firma un protocol na november 2018 y no a cumpli. A entrega nos Status Aparte e diabierna scur di 13 di november 2020 y te cu awe ta keda bira rond y no ta cumpli e invoeringsagenda di e landspakket.
Tin prioridad riba diferente tereno pero no tin un maneho. Nos ta mira cu den e parti di salud mental situacion ta empeora cada dia cu pasa, e planta di purificacion di awa na Bubaliplas y Parkietenbos no a haya e atencion debido y no ta for di awo. Ora a saca e rapport den publicidad nos ta mira cu el a hala atencion. Un rapport cu ta data for di 2019, nos dump na Parkietenbos tampoco ta no haya atencion asina nos por sigui nombra mas.
Cada di cu pasa gobierno ta cera su mesun portanan y ta bay haya su mes entre ”la espada y la pared.” Esaki lo ta e causa di e fin di gabinete aki pasobra nan no tin mas salida y esaki no ta bay hiba mucho tempo.
Pueblo di Aruba ta lucha pa sobrevivi cu tanto medida asina y prijs riba tur cos ta subi cada dia cu pasa. Menos placa den cartera di pueblo lo ta automaticamente menos placa den circulacion. E domino effect aki tur hende lo sintie na final di dia, lider di CURPA a bisa por ultimo.
