Entrante prome di april, AZV lo bay introduci un contribucion propio (eigen bijdrage). Segun tempo ta pasa y e fecha di prome di april ta yegando mas cerca, a haci cu e sector di cuido a bati alarma.
Nan a manda un carta largo pa Staten, Conseho di Minister y Raad van Commisaris di AZV, unda cu nan ta expresa nan opinion cu lo mester reevalua e asunto di contribucion propio (eigen bijdrage) y pa bin cu otro alternativanan pa por genera un entrada extra pa AZV. nan ta pensa mas ariba un ‘sugartax’ of un contribucion propio na SEH (Spoed Eisende Hulp) despues cu triage a indica cu e bishita no tabata necesario (no tabata di gravedad).
Segun e dunadonan di cuido di salud na Aruba, ta reina un preocupacion grandi di con e sistema di salud di Aruba lo ta hinca den otro pa loke ta e contribuicion propio. Nan a bati alarma pa e problemanan logistico cu e idea di ‘eigen bijdrage’ lo trece cu ne.
E sector di cuido, cu ta consisti di docter, specialista, botica, enfermero, FSMA Repaldo, ImSan, laboratorio, etc., ta pensando cu ni gobierno ni AZV no a pensa riba e embergadura di nan idea di cuminza cobra cada pashent un suma extra ora di bay docter, ora di bay Specialista, ora di bay terapia, ora di busca remedi, ora di bay laboratorio, etc.
Nan tin preocupacion grandi y hopi pregunta keto bay ta colga den aire ta kico lo bay pasa. Gobierno no a pensa riba e consecuencianan grave cu esaki lo trece cu ne, ora cu mester cuminsa cobra cada pashent un suma extra ora di bay docter, ora di bay Specialista, ora di bay terapia, ora di busca remedi, ora di bay laboratorio, etc.
Mas aleu, e dunadonan di cuido ta haya cu e introduccion di e contribucion propio lo por tin su consecuencianan social cu ne. E lo crea un division entre e pashentnan y lo crea un problema hopi grandi pa e sector di cuido.
CONSULTA
E dunadonan di cuido ta di opinion cu ni gobierno ni AZV no a consulta cu nan of a pidi pa nan opinion pa loke ta trata e preparacionnan pa introduccion di e contribucion propio. Nan a splica e minister en cuestion, Minister di Salubridad, Dangui Oduber esaki por trece falta di transparencia y inkietud bou di e dunadonan di cuido. Esaki ta door cu e maneho di cuido di gobierno ta unilatreral, unda cu e dunadonan di cuido no tin participacion na ora di traha riba un liña di maneho. Pero den e mesun rosea nan ta admiti cu e minister encarga cu Salubridad Publico a tuma nan preocupacionann hopi serio y cu dentro di poco e lo reuni cu e sector di cuido pa trata e tema aki, cu sigur ta un punto di preocupacion meymey di e poblacion.
Pa mas informacion, lesa TREMPAN.
