E proyecto hotelero Secrets ta un di e dos hotelnan cu ta confronta hopi contratiempo. Den caso di e hotel aki na Sero Colorado e lo mester tabata cla na final di 2021. Awe, memey di 2023, ta solamente un structura di hero por mira, indicativo cu e proyecto probablemente lo keda finalisa te den 2024. Tur esaki debi prome na e situacion di pandemia cu a surgi na 2020 y despues e bataya legal cu casonan den Corte entabla door di habitantenan di e area.
Ta logico pa pensa cu e pasenshi y placa di e desaroyadonan un dia lo por yega su fin. Pero pa awo, esaki no ta e caso, segun un splicacion duna door di prome minister mr. Evelyn Wever-Croes. Gobierno a reuni cu e grupo y no a sinti cu, a pesar di e tardanza, cu kier entrega. Cada banda mester haci di nan parti.
E comunicacion ta sigui y no tin un deadlinea poni. “No a papia di un timeline of deadline. Esey no ta riba mesa. Nos mester haci di nos parti y nan mester haci nan parti. Nos tin comunicacion. Si e yega momento pa bisa “te aki nos ta yega”, mi ta supone cu nan lo informa nos. Pero awo no tin un deadline riba mesa.”
